Siunnersuisoqatigiit: Naalakkersuisut tusaaniarneq ajorpaatigut
- Aalisarneq pillugu siunnersuisoqatigiinni ataatsimiittarnitsinni inassutivut Naalakkersuisunit tusaaniarneqarneq ajorput, KNAPK-imiit Peter Olsen oqarpoq.
Siunnersuisoqatigiit inassutaannut Naalakkersuisut tusaaniartannginnerarlugit Peter Olsen-ip isornartorsiutaa, siunersuisoqatigiit siulittasuannit, Jens K. Lyberth-imit isumaqatigineqarput, siunnersuisoqatigiit inassutaat arlallit Naalakkersuisunit malinneqarsimanngimmata. Jens K. Lyberth pingasunik assersuutissaqarpoq.
- Aalisarneq pillugu ataatsimiititaliarsuarmik pilersitsisoqassasoq inassutigigaluaratsigu, Naalakkersuisut tusaanianngilaatigut. Aatsaat aalisarnermut inatsisissaq Inatsisartut siorna siullermeerlugu suliarereermassut, pilersitsipput. Tassalu suliaq kinguaattoorluni aallartippoq, Jens K. Lyberth oqarpoq.
Aamma 2008-mi raajartassiinissamut siunnersuisoqatigiit siunnersuutaat Naalakkersuisut malinngikkaat, siunnersuisoqatigiit siulittaasuata unnerpaa.
- Naalakkersuisut tunngavilersuinngillat, sooq allaanerusumik aalajangerlutik.
Aamma avataasiorlutik aalisartut saarullittasaannik Naalakkersuisut pisassiinertik suli tunngavilersungikkaat, Jens K. Lyberth oqarpoq.
- Soorunami piffissarujussuaq atoreerlugu, saaffiginnissutivut akineqanngikkaangata kingusissorujussuakkulluunniit akineqaraangata nikallunganartarpoq, aalisarneq pillugu Siunnersuisoqatigiit siulittaasuat, Jens K. Lyberth, oqarpoq.