Siunnersuisoqatigiit: Aquuteralalerisut isumaqatigiissutit malinneq ajorpaat

Ilulissani aquuteralaatillit ilaat ima oqaluttuarput.

- Tassa oqaasiinnartigut isumaqatigiissuteqartarpugut, taavalu uanga unitsiinnarsimallugit, 10.000 koruuneeqqaarlunga allat piinik ikkussisinnaammat unitsiinnarpakka, aquuteralaatilik Karl Frederik Samuelsen oqarpoq. Taassuma aquuteralaat salitsissallugit aaqqissuisartumut ukiup ataatsip matuma siorna tunniuppai. Aquuteralalerisorli oqaatsitigut isumaqatigiissummit allatut iliortoq, Karl Frederik Samuelsen oqaluttuarpoq, maannalu suli aquuteralaat iluarsineqanngillat.

Akiliutissatut oqaasiinnartigut isumaqatigiissutaasimasut allatut kinguneqartartut Atuisartunut Siunnersuisoqatigiit maalaarutitigut takusarpaat. Ilulissani Abel Petersen akisunaarunneqartut ilagaat.

-Misigisara upernaaq ajorami, aquuteralaleriffimminngaanniit isumaqatigiissut malissinnarlugu aquuteralaat tigugakkit akilersinnialeramikkit akii qaffannikuugamikkit, Abel Petersen oqarpoq, taanna oqaasiinnartigut siunnersortinnini naammagisimagaluarpaa, akiliisussanngoramili tupaallatinneqarpoq, isumaqatigiissummit akisunerusumik akiligassinneqarami.

Atuisartunut Siunnersuisoqatigiit aquuteralaatillit aaqqissuisitsinermut atatillugu allakkatigut akinik kiisalu aaqqissuisitsinermut tunngasunik isumaqatigiissuteqarlutik atsioqatigiittarnissaat siunnersuutigaat.

- Isumaqatigiissutip eqquutitinneqarnissaa inatsisitigut tunngaveqartinneqarpoq. Oqaasiinnartigullu isumaqatigiissutit eqquutitiinneqarnersut uppernarsaruminaattarmat pingaaruteqarpoq aquuteralannik aaqqissuisussat allakkatigut atsioqatigalugit isumaqatigiissuteqarfigisarnissaat, Mark Larsen atuisartunut siunnersuisoqatigiinni inatsisileritooq nassuiaavoq.

Taamatullu kaammattuineq atuisut ilaasa tigulluarpaat, aquuteralaatilik Anthon Broberg siunissamut eqqaamasassinneqarpoq.

- Tassa taanna atorusuppara, pappiaraq isumaqatigiissutigalugu atsiorluni, immaqa allarpassuit aamma taamaalissapput, Anthon Broberg oqarpoq.

Inatsisilerituup Mark Larsenip ilanngullugu oqaatigaa isumaqatigiissutinik eqquutititsinnginnermut tunngassuteqartunik naammagittaalliuutit pingasut Atuisartunut Siunnersuisoqatigiinnit maanna suliarineqartut.

Naammagittaalliuutit ukiup ataatsip ingerlanerani suliarineqarlutik naammassineqartartut.