Siunnersortit ilinniagaqalernissaminnut periarfissinneqarput
Kommunini Pinaveersaartitsinermi Siunnersortitut atorfeqartitsineq 1997-imiilli atuutilerpoq.
Kommunini 16-ini Pinaveersaartitsinermi Siunnersortitut maanna atorfeqartut, siorna periarfissinneqarput ilinniagaqalernissaminnut.
Ilinniartitaaneq sisamanik modul-inik immikkoortulik pillugu, Paarisap immikkoortuata pisortaa, Bodil Karlshøj Poulsen, ima oqarpoq.
Pinaveersaartitsinermi Siunnersortit ukiut tamarluinnaasa kissaatigisarpaat ilinniagaqarlutik naammassisaqarnissartik ukiumoortumik pikkorissariartortitaaginnaratik. Maani Pisortaqarfitsinnit politikikkut kissaatigisaraarput Pinaveersaartitsinermi Siunnersortit Ilinniartitaasalernissaat, taava 2006 mi Aningaasaqarnermi Inatsimmi akuerineqarpoq aningaasanik illuartitsisoqarnissaa, Bodil Karlshøj Poulsen nassuiaavoq.
2006-imi koruunit millionit affai, taamatullu 2007-imi aamma koruunit millionit affai, ilinniartitaanermut atugassanngortinneqarput.
-Taava taakku qulakkeerneqareermata, Peqqissaanermik Ilinniarfik KANUKOKA-lu attaveqarfigaavut, Ilinniartitaanermi pilersaarusioqatigiiffigilerlutigik, Bodil Karlshøj Poulsen oqarpoq.
Salliutillugu pingaartinneqarpoq kommunini aggerfiusuni siunnersortip ataqatigiissaarisutut inissisimanera naqissuseqqissallugu. Ilinniartitaanerullu imarisai qiviarutsigik, tassaapput, inuiaqatigiinni pissutsit atukkat, inatsisit, peqqinnissakkut siuarsaanerit, pujortartarneq, atoqatigiittarnerit, persuttaasarnerit, meeqqanik kinguaassiutitigut atornerluisarneq, imminut toqunnissamut pinaveersaartitsineq, kiisalu nerisat timigissarnerlu.
-Taagorneqartut saniatigut nappaatit tuniluuttut pillugit ilinniartitsisoqartarpoq, kiisalu nalunaarusiorneq aamma pineqartarluni, Bodil Karlshøj Poulsen naggasiivoq.
Nunatsinni kommunini Tasiilaq Ivittuullu kisimik ilinniartitaanermut nutaamut aallartitaqanngillat.
Modul-it sisamaani misilitsinneq anguniassagaanni, ilinniartup uppernarsarsinnaassavaa modul 1, 2 aamma 3-mi misilitsissimanini, angusaqarfigisimasanilu.
