Ilinniarnertuunngorniarfiit nunatsinniit tamakkiisumik aqunneqalernissaat Naalakkersuisunit maannakkorpiaq sulissutigineqarnera tunngavigalugu, nunatsinni ilinniarnertuunngorniartut tamarmik 850-nik amerlassuseqartut ullormik immikkut sammisaqarfimmik taasamik sulisinneqarput. Qaqortumi Ilinniarnertuunngorniarfimmi rektori Gregers Aagaard ima oqarpoq.
- Ilinniartuutigut ullormik immikkut sammisaqarfimmik taallugu suliaqartippavut. Ilinniartut apeqqutinik siunissami ilinniarnertuunngorniarfiit qanoq ittuujumaarnerat pillugu imalinnik 80-nik tunineqarput.
Apeqqutini apeqqutigineqartarput ilinniarnertuunngorniarfik ajoquteqanngitsoq qanoq ittuusinnaanersoq.
Ilinniartitsisoq ajoquteqanngitsoq ilinniartitsisorlu pitsaavallaanngitoq qanoq ittuunersoq apeqqutit akissutaanni itisilerniarneqartussaapput, Qaqortumi ilinniarnertuunngorniarfiup rektoria Gregers Aagaard oqarpoq, nangipporlu.
- Apeqqut aamma tikinneqartussaq unaavoq Ilinniarnertuunngorniarfik ajoquteqanngitsoq eqqunneqassappat qanoq piviusorsiortigissanersoq, naggataatigullu aamma politikkerinut apeqqusiussapput, Gregers Aagaard oqarpoq.
Taanna aperaarput ilinniartut tamatuminnga isummersortinneqarnissaat sooq pingaartinneqarnersoq.
- Ilinniartut tassaapput ilinniakkaminnik atuisussaasut, taamaattumik pingaaruteqartorujussuuvoq paasissallugu ullumikkut Ilinniarnertuunngorniarfiit sukkutigut sanngeequteqarlutillu nukittuffeqarnersut, Gregers Aagaard oqarpoq.
Taanna nangilluni nassuiaavoq apeqqutit akissutaallu katersorneqareerlutik tamarmik atuarneqareerpata siunissami Ilinniarnertuunngorniarfiup aaqqissuunneqaqqinnerani tunngaviliisooqataajumaartut.