Siunissami atuakkiortussamaataavit?

Nunani Avannarlerni Piorsarsimassutsikkut Attaveqaat, NAPA, Nunatta Atuagaateqarfia, Nuummi Inuusuttut Siuarsartut, NUIF, aamma Milik Publishing oqaluttualianik ukiaru unammisitsissapput taaguuserlugu "Allatta" - inuusuttunut saaffiginnittoq.

Allalluagaanerpaat qulit toqqarneqassapput, taamalu pisoqareerpat ataatsimut atuakkiarineqassapput, kalaallisut qallunaatullu oqaasertalimmik.

Oqaluttualiornermi sammisassaq tassaavoq "Inuusuttut - nunatsinni nunarsuarmilu", peqataaniaraannilu 15-it 25-llu akornanni ukioqartariaqarpoq.

- "Allatta"-mi anguniagaavoq inuusuutut ullutsinni inuunerminni soqutigisatik aallaavigalugit takorluukkersaarsinnaanerisa eqeersarnissaat. Aamma neriuutigaarput, oqaluttualiat atuakkatut saqqummeriarpata inuusuttut atuarusussusiannut ilasaataajumaartoq, unammisitsinermik aaqqissueqataasut oqarput.

Oqaluttualiat nassiunneqartut, kalaallisut qallunaatulluunniit allatat, naliliisartunit misilittagaqarluartunit nalilerneqassapput, allalluagaanerpaallu qulit tassa toqqarneqassallutik.

Oqaluttualiortut tamarmik immikkut 2.500 koruuninik akissarsitinneqassapput - minnerunngitsumillu - atuakkiornermut Kangerlussuarmi pikkorissartinneqassallutik.

Oqaluttualiornermik unammisitsineq septembarip ulluisa aallaqqaataanni aallartissaaq, maannamiilli tassa tusarliunneqareerluni, inuusuttut allakkusussuseqartut pissanganartunik oqaluttualiornissaminnut eqqarsarfissaqaluarniassammata...immaqalu allattuilereerlutik.