Siumut: Utoqqatserneq naammanngilaq
Sisamanngormat tusarliunneqarpoq, Sermersuup borgmesteria Charlotte Ludvigsenip akiuussusertinniarlutik utaqqisorpassuit, naartusut, milutsitsisut allarpassuillu akunnerpassuit atorlugit tunuleriaartuni utaqqineranni qaangiinnarlugit atorfilittallu akiuussuserneqarsimasut. Tamanna pillugu borgmesteri utoqqatserpoq, utoqqatsernerli naammanngitsoq iterngalu tikillugu misissuisoqartariaqartoq Siumut sinnerlugu kommunalbestyrelsemi ilaasortaq Inga-Dora Gudmundsdottir oqarpoq.
- Siumut-gruppeaniit piumasaraarput pisoq pillugu tulliani kommunalbestyrelse ataatsimiilerpat eqqartuisoqassasoq, taamaaliorniarpugullu qanorpiaq pisoqarsimanera paaserusukkatsigu, taanna oqarpoq.
Taanna nangilluni oqarpoq borgmesterip tunuleriaannermut kultureqannginnera kinguneqartinneqartariaqartoq.
Borgmesterip akiuussutisserneqarneqarnera pillugu suliaq:
- Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
- Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
- Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
- Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
- Borgmesteri, Charlotte Ludvigsen taassumalu atorfilittai pingasut siuleriaattut ullaap tungaani saneqquppaat, taakkulu matukkut allakkut isertinneqarput. Atorfilittat silataani siuleriaattunik nakkutiginninnermi ikiuuttussaapput.
- Akiuussutissalersuinermut ataqatigiissaarisup, Anna Wangenheimip oqarnera naapertorlugu taakku akiuussutisserneqarnissamik piumsaqarput – taamaattoqanngippallu siuleriiaattuni ikiuiniarnatik.
- Kommunip siorasaaruteqartoqarneraanera itigartitsissutigaa – borgmesterillu tamanna ”paatsooqatigiinnerusimassasoq” ilimagalugu.
- Borgmesterip siuleriiaattunik qaangiiginnarluni utaqqisorpassuit allat sioqqullugit akiuussutisserneqarsimanini utoqqatsissutigaa.
- Namminersorlutik oqartussat utoqqatsertoq: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.
Immikkut pineqartussaanngilaq
Aviisimut Sermitsiaq.ag-mut Aalborgip Universitetiani Inatsisilerinermut professori Sten Bønsing issuarneqarpoq, borgmesterip taassumalu atorfilittaasa immikkut ittumik imminnut pillutik utaqqisorpassuit qaangiinnarlugit akiuussusertissimanerat pissaanermik atornerluinertut paasineqarsinnaasoq. Inga-Dora tamanna pillugu isumaqarpoq, qanorluunniit borgmesteri utoqqatseraluarpat tamanna takutitsinerlunnerujussuusoq.
- Akiuussusertinniarluni ikusikkaatut pissusilersortoqarpoq, tamannalu pissusissamisuunngilaq, immikkut ittumik imminnut pitipput, taamatullu pisoqaqqissanngilaq, tamattami naligiittussaavugut, taama oqarpoq Inga Dora G. Markussen.
LÆS OGSÅ Charlotte Ludvigsen om at springe vaccinekøen over: Jeg beklager - undskyld!
Tusaamanerlunneqalersinnaaneq
Inga Dora G. Markussen naapertorlugu borgmesteritut eqqarsaqqissaartuarnissaq pisariaqartoq, taamaanngippat kommunemut sulisuinullu tamarmut tunnerlussinnaammat:
- Charlotte Ludvigsen borgmesteritut eqqarsarluanngikkuni tamanna kommunemut tamarmut anorersuartut ittumik kingunerlutitsisinnaavoq, sulisullu matumani aamma tamarmik eqqorneqarsinnaapput, taanna oqarpoq.
Aamma Inuit Ataqatigiit tunuliaqutaralugu naalakkersuisut siulittaasuat tamanna pillugu ajuusaarpoq. KNR-mut akissumini ilaatigut oqarpoq, qinikkatut inissisimassagaanni, iluamik pissuserissaarnissaq pingaaruteqarluinnartuusoq.
