Siumut ukiunik 30-nngortorsiorpoq
Siumut partiitut ukiunik 30-nngortorsiorluni nalliuttorsiornissani sapaatip akunnerani uani pikkorissarnermik ullumikkumiit aallartippai. Partiip aaqqissuussaanera nutaaq, anguniakkat nutaat aamma qinikkatut sulinermi piukkunnarsarnermik kiisalu nittartakkamik atuisinnaanermut ilinniarfittut qulequtserlugit pingasunngorneq ilanngullugu atorneqassapput.
Socialdemokratit nunani avannarlerni suleqatigiiffiat, SAMAK, Islandimit, Savalimmiunit, Ålandimit, Danmarkimiillu peqataaffigineqartumik, sisamanngorpat isumasioqatigiissitsissaaq, suleqatigiissutissanik atsioqatigiinnermik naggaserneqartussamik.
Tallimanngorneq immikkut ittumik ataatsimeersuarnermut atorneqassaaq, partiip malittarisassai nutaat saqqummiunneqassallutik, kommunini nutaassani siulersuisussanik qinersisoqassalluni, aamma anguniakkat nutaat saqqummiunneqareerpata taasissutigitinneqassallutik. Siumut partiip ukioqqortoqataa, Sulisartut Højskoliat, peqatigalugu arfininngorpat ulloq nalliuttorsiorfigineqassaaq, Upernaviarsummullu sapaammi angalaartoqassalluni.
