Siumut siulittaasussarsiussaaq
Tassami malittarisassat nutaat naapertorlugit ilaasortat tamarmik – ataatsimeersuaqataasuinnaanngitsut – partiip siulittaasussaa aappaagu qinertussaavaat.
Partiip allattaata Mikael Petersenip uppernarsarpaa Siumup immikkoortortaqarfiisa, nunarput tamakkerlugu 70-iusut, ilaasortaat amerliartuinnavissut, tamatumunngalu siulittaasumik qinersinissaq ilaatigut pissutaasoq.
Siulittaasumik qinersisarnermi periuseq nutaaq Siumup ukiormanna 30-liilluni nalliuttorsiorneranut atatillugu ataatsimeersuarnermi akuersissutigineqarpoq, matumani partiimi ilaasortat oqaasissaqaqataanerat nukittorsarniarneqarluni.
- Partiimut siulittaasutut qinigassanngortinniaraanni nalunaarfissaq kingulleq tassaavoq januaarip arfernat. Manna tikillugu siulittaasutut qinigassanngortinniartunik suli nalunaartoqanngilaq, taamaattorli naalakkersuisut siulittaasuata Hans Enoksenip qinigassanngorteqqinnissaa naatsorsuutigaara. Mannami tikillugu kajumissaarneqarluarmat, Mikael Petersen oqarpoq.
Siulittaasumut qinigassanngortittoq ataasiinnaappat ilaasortat siulittaasumik qinersitinneqassanngillat. Qinigassanngortittulli arlaliuppata, immikkoortortaqarfinni 70-iusuni ullormi ataatsimi ataatsikkut qinersisoqassaaq. Taannalu pissaaq partiip ataatsimeersuarnissaa, februaarip arfernani pisussaq, ullunik 14-inik sioqqullugu.
Manna tikillugu Siumup siulittaasussaanik qinersisarnerni nunaqarfiit aalajangiisuusaraluarput, taakkumi ataatsimeersuarnermi amerlanerpaallutik ilaatitaqartarmata. Tamannali siulittaasussarsiorluni aappaagu qinersinissami allanngortinniarneqarpoq, ilaasortat tamarmik qinerseqataasussanngorlugit. Matumani ilaasortat tamarmik qinersisinnaatitaassapput, taamaallaallu piumasaqaataavoq 2008-mut ilaasortaanermut akiliutip akilerneqarsimanissaa.
