Siumut sinnerlugu borgmesterit: Nuummi eqiterussisoqarpallaarpoq
Pisortallu aningaasaqarnerat ukiuni makkunani ajorsigaluttuinnartoq eqqarsaatigalugu sinerissami illoqarfinni allani suliffissaqartitsiniarneq aamma piorsaavigineqartariaqarpoq.
Jørgen Wæver Johansen, Hermann Berthelsen aamma Ole Dorph tusagassiuutinut ataatsimut taama nalunaaruteqarput, sinerissami illoqarfiit Nuummut naleqqiullugit ukiuni kingullerni piorsaavigineqarpallaarsimannginnerat pingaarnertut oqariartuutigalugu.
Imminut napatinnermik toqqammaveqarluni nammineerneq
- Assigiinngisitsinerup tamatuma illuatungeriiaartunngortitsinerullu sakkortusiartuinnartup ataatsimoorluta anguniagassatsinnik angusaqalertornerusinnaanerigaluarput piuminaallisinnaavaa: Namminersorneq aningaasaqarnikkullu imminut napatinnermik toqqammaveqarluni nammineerneq, Kommune Kujalliup, Qeqqata Kommuniata Qaasuitsullu Kommuniata borgmesterii ilaatigut allapput.
Naligiissaarinissamut aaqqissuusseqqinnissaq pillugu Naalakkersuisut juulimi saqqummiussaqarput, Kommuneqarfik Sermersooq matumani 56 millionit koruuninik annaasaqartussanngorluni.
Kommuneqarfik Sermersuumi kommunalbestyrelsip ataatsimoortup siunnersuut ilalernartinngilaat, borgmester Asii Chemnitz Narupilu isorinnittunut aamma ilaalluni.
Isorinnittoqarsimaneralu Aningaasaqarnermut Naalakkersuisup Vittus Qujaukitsup tusaaniarsimavaa, naligiissaareriaasiugallartussaqarnissaa maanna siunniullugu.
