Siumut Nalerarlu siunnertaqaqatigiinnermik isumaqatigiissuteqareerput, ukiunilu tulliuttuni sisamani sulinissamut tunngasumik isumaqatigiissusiap inaarsarnissaa tullinnguuttoq, Jakob Petersenip paasissutissiissutigaa.Assi: Avannaata Kommunia.

Siumut: Sakio Fleischer Avannaata Kommuniani borgmesterinngussaaq

Kommunalbestyrelsimut qinerneqartunit Siumumi taaguunneqarnerpaat pingajuat, Sakio Fleischer Avannaata Kommuniani borgmesterinngussaaq.

Uummannameersoq, Sakio Fleischer Avannaata Kommuniani borgmesterinngussaaq. Siumut Ilulissani immikkoortortaqarfiata siulittaasua, Jakob Petersen taama nalunaaruteqarpoq.

- Massakkut Avannaata Kommuniani Siumup kommunalbestyrelsimi ilaasortaatitaasa arfineq pingasuusut tamarmiullutik isumaqatigiissutigisaat tassaavoq, Uummannarmiu Uummannamilu najugalik, Sakio Fleischer borgmesterinngortinneqassasoq.

Sakio Fleischer Avannaata Kommuniani kommunimut qinersisoqarnerani 135-nit taaguunneqarpoq.

Assi: Sakio Fleischer. 

Taamaalilluni Avannaata Kommuniata pisoqarfiunera naammassiniarpasilerpoq.

Sakio Fleischerimmi Uummannamit Ilulissani piffissami aggersumi nuunnissani naatsorsuutigisinnaavaa.

Borgmesterinngorniuunneq pisoqarfiungaatsiartoq

Taannami Avannaata Kommuniani kiap borgmesterinngussanerata sapaatip akunnerata kingulliup ingerlanerani nalornissutigineqarnerata kingornatigut borgmesterinngortussanngorpoq.

Minik Høegh-Dam, Siumut sinnerlugu qinigaarlaaq maannamut borgmesteriusumit Palle Jerimiassenimit taaguunneqarneruvoq, taassumalu Naleraq isumaqatigiissusiorfigalugu borgmesterinngornissani qulakkeeraluarpaa.

Tamanna pissutigalugu Palle Jerimiassen Siumumit anivoq.

AAMMA ATUARUK Siumut Ilulissat: Tunuliaqutsiiunnaarnitsinnut aningaasat peqqutaapput

Borgmesterimummi qinersineq allamik aamma pisoqarfiuvoq. Minik Høegh-Damimmi hashimik tuniniaasimasinnaaneq pillugu nunatta eqqartuussiviani eqqartuussaanissaa saqqummerpoq.

Minik Høegh-Damimut tunngatillugu suliaq tusagassiuutitigut saqqummereernerata kingunerisaanik Siumut Ilulissani immikkoortortaqarfiata tassunga tapersiinini tunuartippaa.

Taamaammat tassunga taarsiullugu Sakio Fleischer borgmesterinngortussanngorpoq.

Siumut Nalerarlu siunnertaqaqatigiinnermik isumaqatigiissuteqareerput, ukiunilu tulliuttuni sisamani sulinissamut tunngasumik isumaqatigiissusiap inaarsarnissaa tullinnguuttoq, Jakob Petersenip paasissutissiissutigaa.

Isummersuutit