Siumut: Pinerluttunik isumaginninnermik inatsit allanngortinneqarli
Kalaallit qallunaatut kalaallisullu oqaasillit eqqartuussinermi unnerluussissutigineqartut kalaallisut allassimanissaannik piumasaqaatip Danmarkimi eqqartuussiviit qaffasinersaanni højesteretimi 2009-mi itigartitsilluni aalajangiisimaneq KNR-imi pissami kingullermi sammineqarpoq. Inatsit malillugu kalaallisuinnaq oqaasillit eqqartuussisoqarnerani oqalutsinit nutserunneqassapput.
Taamatut inatsiseqarneq nunatta eqqartuussisuuneranit, eqqartuussivinni eqqartuussisunit inatsisilerituunillu isornartorsiorneqangaatsiarpoq.
Professor Ole Spiermann inatsisip taassumap mississorneqarnissaa pillugu Siumumit piumaffigineqarpoq.
Ole Spiermann misissuinermini inerniliiluni oqarpoq, pinerluttunik isumaginninermik inatsit allanngortinneqartariaqassasoq, kalaallit kalaallisuinnaq oqaasillit unnerluussissutinik kalaallisut allassimasunik pisinnaatinneqalissappata.
Pinerluttunik isumaginninnermik inatsit danskit naalagaaffianit oqartussaaffigineqarmat, inatsisip allanngortinneqartinneqarnissaanut tamanna folketingimi aalajangiiffigineqartussaavoq, taamaattumik inatsisip allanngortinneqarnissaanut folketingimut ilaasortaq Lars-Emil Johansen siunnersuuteqarniarpoq.
- Kalaallit innuttaasut taamatut pisinnaatitaaffeqannginnerat kukkuneruvoq. Namminersornerup eqqunneqarneqaratigut kalaallit oqaasii pisortatigoortumik atorneqarnissaat atuutilerpoq, tamannalu akuerineqarsinaanngilluinnarpoq allanngortinneqartariaqarlunilu, Lars-Emil Johansen oqarpoq.
Kalaallit Nunaanni unnerluussisuusut, tassalu politiit, erseqqisarpaat, innuttaasut nammineq oqaatsitik atorlugit kiffartuunneqarusuttut ataqqisarlugit, oqaatsinillu marluinnik atuisinnaasut unnerluunneqartarnerini taakkua nutserunneqarneq ajortut, tamanna namminneq piumasarinngikkaangassuk.
Folketingimi aasaanerani sulinngiffeqarneq qaangiuteriarpat, inatsisissatut siunnersuut Lars-Emil Johansenip saqqummiunniarpaa.
