Siumut partiini suli annerpaavoq
Partii ajornartorsiutilik Kim Kielsenip siuttuuffigilerpaa. Inunnik isumasiuinerit takutippaat partii tapersersornikinnerulerismasoq, ippassarli qinersinermi anggusartik Kim Kielsenip nuannaarutigaa:
- Naatsorsuutigineqarsimagaluarpoq kinguariarujussuassasugut, kisianni taamaanngilaq. Inuiaqatigiit aalajangiipput, kinguarialaarpugut, kisianni suli siuttuuvugut, Siumup siulittaasua Kim Kielsen oqarpoq.
Siumut 10102-nit qinerneqarpoq, Kim Kielsen taakkunannga 4604-nit qinerneqarluni.
Naalakkersuisoqatigiiliornissallu Kim Kielsenip siuttuuffigissavai, kikkulli suleqatigilersinnaassanerlugit oqaatigisinnaannginnerarpaa, siammasissumilli suleqatigiittoqarnissaa orniginartippaa:
- Oqariartuutigereerparput sapinngisagut tassa partiit tamanut matut ammapput. Oqaloqatigiittariaqarpugut, ataatsimoornissarput inuiaqatigiit tamanna massakkut pisariaqartippaat, Kim Kielsen oqarpoq.
Naalakkersuisoqatigiinnillu qaqugu ilisarititsisinnaassanerluni aamma oqaatigisinnaannginnerpaa:
- Massakkut oqaatigisinnaanngilara qanoq sivisutigisumik oqaloqatigiittoqassanersoq, kisianni teqeqqut assigiinngitsut piiartariaqarpagut. Eqaannerusumik ingerlasariaqarpugut, torersumillu ingerlaniassaagut, Siumup siulittaasua Kim Kielsen oqarpoq.
