Siumut partiini suli annerpaajussagaluarpoq

Inatsisartunut 2005-imi qinersinertut ullumikkut qinersisimassagunaraluartutit, isumasiuisarfiup HS Analyse-p misissuinerata takutippaa. Sermitsiaq inunnik isumasiuisitsisuuvoq.

Partii Demokraatit siuariarnerpaavoq, 2,2 procentinik siuariarluni, tassa 25,2 procentinit qinerneqassagaluarluni.

Kattusseqatigiit partiiat ilaasortaatitaqarunnaassagaluarput, ilaasortaatitaqaannarnissaq procentinik pingasunik inoramikku.

Inunnik isumasiuineq juunip qaammaataata qiteqqunnerani ingerlanneqarpoq, isumasiuinerullu takutippaa partii Siumut suli annersaassagaluartoq, naak qinikkamik ataatsimik annaasaqassagaluarluni.

Atassut taamaaginnapajaarluni, 0,6 procentinik kinguariassagaluarpoq.

Kisitsisit saqqummersinneqartut naalakkersuisut siulittaasuannit, Hans Enoksenimit, annertunerusumik qisuariaateqarfigineqanngillat:

- Maannakkut isumasiuisitsisimaneq upperinngilara. Isumaqartoqartuartarpoq qinersisoqarnerani Siumut ajorsartinneqassasoq, killormulli pisoqartuaannarpoq, Hans Enoksen oqarpoq, nangillunilu:

- Isumasiuinermit Siumup kinguariarnissaanik siulittuuteqarneq ernumanartoqartinngilluinnarpara, Hans Enoksen oqarpoq.