Siumut pakasarneqarsoraaq
IA-p Siumumik suleqateqarnini taamaatillugu ippassaq nalunaarutigaa, kinguninngualu partiit allat peqatigalugit Qaasuitsup Kommunianut akileraarutissat 2011-mi procentimik ataatsimik qaffallugit.
Suleqatigiinnerup unitsinneqarneranut IA-mit pissutigitinneqarpoq, Siumut kommunip aningaasaqarneranik aqutsisinnaannginneranut IA peqataasinnaanngimmat.
Siumulli maanna akissuteqarpoq. Oqarput IA namminivik aappaagumut 2011-imut missingersuusiat qanoq isikkoqarnissaanut aalajangersaaqataasimasoq, naallu Siumut akileraarut qaffatsinniarnagu sipaarniutissanik tikkuussigaluartoq, tusaaneqarsimanatik, Siumup kommunalbestyrelsemi ilaasortaatitai sinnerlugit Palle Jerimiassen tusagassiuutinut nalunaaruteqarluni allappoq.
Sooq Siumut, kommunip aningaasaqarnera ajoreeraluaqisoq, akileraarutinik qaffaarusussimanngikkaluarnersoq pillugu aperineqarami, Palle Jerimiassen sermitsiaq.ag-mut ima oqarpoq.
- Ukiakkut ataatsimiinnermi ilaqutariit pissakinnerpaat akitsuutinik annertuumik qaffaavigineqarput siullerpaamik ikummatissamut, pingmaartumillu kommunitsinni aalisartut piniartullu akileraarutinik akitsuutinilu nutaanik artukkeqqissinnaanngilagut, Siumup oqaaseqartua oqarpoq.
IA-p kommunip borgmesteria, Jess Svane, ippassaq upissuppaa, aningaasaqarnermik aqutsisinnaannginnerarlugu.
Siumut sinnerlugu oqaaseqartartup Palle Jerimiassenip uparuaaneq tunoqqutsilluni sulinertut akuersaanngisaannagassatut nalilerpaa.
Jess Svanep borgmesteriunera ulorianartorsiunngilaq, tassami ukiuni sisamani issiasussatut qinigaanikuuvoq. Kisianni Siumut kommunalbestyrelsemi aappaagu 2011-mi ataatsimeeqqilertinnani allanik suleqatissarsisimanngikkuni, partiip tunulequtaata suliniarnera kommunimut qinerseqqinnissap 2012-p tungaanut maannakkornit ajornakusoornerusinnaavoq.
