Siumut Nuuk: aviisi kalaallisuinnaq saqqummertartussaq
Siumup Nuummi immikkoortortaqarfiata nunatsinni nutaamik aviiseqalernissaa sulissutiginiarpaa aviisilu taanna kalaallisuinnaq naqinneqartassaaq.
Partip immikkoortortaqarfia qanittukkut ukiumoortumik ataatsimeersuarmat tamanna siunnersuutit ilagaat. Taamaattorli immikkoortortaqarfimmi siulittaasup Lars-Emil Johansenip parti nammineerluni aviisimik saqqummersitsisassanngitsoq oqaatigaa.
- Allat aviisimik taamaattumik aallartitsinissaat sulissutiginiarparput. Tamanna aviisinut pioreersunut akerliuniarnerunngilaq, taamaattorli isumaqarpugut apeqqutit inuiaqatigiinnut pingaaruteqartut sammineqanngippallaartartut, Lars-Emil Johansen oqarpoq.
- Qularnanngilaq tamatumunnga patsisaasut arlaliusinnaasut. Tamakkua ilagisinnaavaat inuit iluamik oqalliseqataassagunik oqaatsinut marlunnut pikkorissuusariaqarnerat. Tamanna oqaluinnarnermi atuuppoq minnerunngitsumillu allassinnaanermi. Nammineerlunga nalunngilara oqaatsit marluk atorlugit allattariaqartarneq pisarissersuutaasarmat.
- Kalaallisuinnaq aviiseqartariaqarneranut pissutaasoq alla tassaavoq, isumaqaratta ullumikkut nukippassuit qallunaatuunngortitsinermut imaluunniit kalaallisuunngortitsinermut atorneqartarnerat. Nukiit tamakkua oqallinnerunissamut imaluunniit amerlanerusunik nutaarsiassalerinissamut atorneqarsinnaapput, Nuummi Siumup siulittaasua oqarpoq.