Siumut : Nunatta Karsiata sinneqartoornera nuannaarutissaanngilaq
![](/sites/default/files/styles/image_934x467/public/article_images/per_berthelsen_630_0.jpg?itok=N0mUry48)
Siumut sinnerlugu Inatsisartut Aningaasaqarnermut ataatsimiititaliaani ilaasortaq, Per Berthelsen isumaqarpoq kukkusoqarsimaneranut pissutaanerusoq aqutsinerluttoqarsimanera:
- Ukua kisitsisit sinneqartooruteqarnermik takutitsigaluartut, nuannaarutissatut oqaatigineqarsinnaanngillat, tassami aqutsinerlunnerup kinguneranik taamaattoqarsimammat, tamannalu nuannaarutissaanngivippoq, Per Berthelsen oqarpoq.
Sooq taama nikingatigisumik naatsorsuusiortoqarsimanera Aningaasaqarnermut Naalakkersuisumut, Maliina Abelsenimut ippassaq apeqqutigaarput, taannalu ima akivoq:
- Kisitsisit naatsorsuutigisamit taama nikingatigineri eqqarsaatigalugit naatsorsuusiortarnerput pitsaanerusinnaagaluarpoq. Tulluusimaarutigisinnaasarpulli unaavoq aningaasaqarnerput nammaqatigiilluinnarmat, naak illuatungiliuttut oqaraluartut aningaasaqarnerput 2010-mi iluatsissimanngitsoq, Nunatta aningaasaqarneranut akisussaasoq, akivoq.
Naatsorsuutit ersersippaat koruunit milliardit affaasa missaanik naatsorsuusiortoqarnerani kukkusoqarsimasoq.
Nunatta karsiata naatsorsuutai qimerlooraanni takuneqarsinnaavoq, immikkut ittumik 145 millioni koruunit angullugit isertitaqartoqarsimasoq, taakkulu 2009-mili naatsorsuutinut ikkunneqarsimasussaagaluarlutik, aatsaalli 2010-mi naatsorsuutinut ilaatinneqalersimasut. Taamaattoqarnerani pitsanngoriaat tassaavoq 120 millioni koruunit.
75 millioni koruunit akileraarutinit isertitsissutaasut eqqarsaatiginngikkaanni utoqqatsissutissaqarnatik Maliina Abelsenip oqaatigaa nangillunilu:
- 2009-mi Akileraartarnermit isertitaasut naatsorsuutinut ilanngunneqarsimanngillat aatsaalli 2010-mi ilanngunneqarsimallutik, tamaattoqarsimanera kukkunermik kinguneqarpoq aaqqinneqartariaqarlunilu, oqarpoq.
Nunatta sineriaani uuliamik misiliilluni siorna qillerinernut tunngatillugu akileraarutit tassanngaanniit isertitaasut nikigasoornermut pissutaanerupput. Aammalu nikigassutaasunut 264 millioni koruuninut pissutaaqataapput, ingerlatsinermut atuinikillisimanerput, sanaartorunnaamisimanerput aammalu soorlu utoqqalinersiaqarnermut, siusinaartumik sulisinnaajunnaarnersiaqarnermut aammalu meeqqat tapisiarisartagaat ikinnerulersimammata. Taakkulu naatsorsuusiornermi eqqoruminaassimapput:
- Naatsorsuinerliortoqarsimavoq. Taamaattorli oqartoqarsinnaavoq aningaasartuutit naatsorsuutaasut eqqarsaatigalugit isertitagut amerlisimapput, tamannalu peqquteqarpoq Oqartussaqarfimmi sipaarniuteqarsimanitsinnik. Aamma inatsisitigut pisussaaffiliisumik pisortatigoortumik aningaasartuutigut ikilisimapput. Taakkunanngalu sipaarutigisinnaasagut ukiumiit ukiumut allanngorartarput, tassani apeqqutaagami utoqqalinersiallit isertittagaasa qanoq nikerartigineri, Maliina Abelsen oqarpoq.