Siumut nunani avannarlerni Socialdemokratinik suleqateqarnerminik annertusaavoq

SAMAK-ip tassalu nunani avannarlerni Socialdemokratit sulisartullu kattuffiisa suleqatigiiffiat, Siumup ukiuni arlaqalersuni suleqatigisimavaa. Suleqatigiinnerlu suli annertusarneqarniarpoq.

Uani ataatsimiinnermi qularinngilara arlaatigut aamma alloriartoqaqqissasoq, suli pitsaanerusumik ataqatigiinnerulernissaq. Tassa pisariaqartittorujussuuarput tamatta annertunerusumik attaveqarnerulernissarput, naak nalinginnaasumik naapittarnerit ingerlanneqartaraluartut kisianni annertusarnissaat siunnerfigalugu massakkut aamma suleqatigiissutissat aallartissavavut, aammalu Qallunaat Nunaanni socialdemokratit aamma atsioqatigisussaavavut annertunerusumik suleqatigiinnerulernissarput aqqutissiuunniarlugu.

Sutigut soorlu taava annertunerusumik suleqatigiissinnaavisi?

Tassa uani anguniakkavut, soorlu nunamik piginnittussaaneq namminersornerup eqqunneqarnissaa, aammalu siunissami namminersulivinnissarput tamakkua suleqatigiissutigisussaavavut, taavalu aamma politikkikkut socialdemokratit anguniagaasa aamma nunatsinni siuarsarneqarnissaat aammalu uagullu aamma anguniakkatta annertusaaffigineqarnissaat taakkua tassa atsioqatigiissutigisussaavavut.

Suleqatigiissutissanik atsioqatigiinneq unnuk manna Sulisartut Højskolianni pissaaq.