Siumut: Namminersorneq pisussaaffiliivoq
- Innuttaasut tamatta Namminersornermut piginneqataasutut misigisimanissarput aalajangiisuuvoq, nunaqarfinniikkutta, kommunerujussuarniikkutta, illoqarfinniikkutta avinngarusimasuniikkuttaluunniit tamatta pingaartinneqarluta, aamma naligiittut isigineqarluta, peqataatinneqarnissarput aalajangiisuuvoq. Namminersorneq tassaavoq inuiaqatigiittut tamatta pigisarput, tamattalu piginneqataaffigalugu pigisassarput. Kalaallit Nunaatalu Naminiilivinnissaanut piareersarnermut tamanna atussavarput, Aleqa Hammond ukiortaami pilluaqqussummini ilaatigut allappoq.
Inuiaqatigiinni ajornartorsiutitta ammasumik oqallisigineqartarnissaat qanoq pingaaruteqartigisoq ilutigalugu aamma tikkuarpaa.
- Imigassamik ajornartorsiuteqarneq, ikiaroornartumik ajornartorsiuteqarneq, inooqatigiinnikkut ajornartorsiuteqarneq, kinguaassiuutitigut atornerluinermik ajornartorsiuteqarneq, aningaasanoorajunnermik ajornartorsiuteqarneq - tassaapput ukiumi nutaami angusaqarfiusumik ajornartorsiutit annikinnerulersinneqarnissaannik suliniarfissaq. Suliniarneq inuusuttunik suleqateqarnikkut pinaveersaartitsinikkullu anguneqassaaq, Siumup siulittaasua erseqqissaavoq.
Aleqa Hammond aamma oqarpoq, Namminersornerup siunissaa innuttaasut suleqatigalugit ilusilersorneqassasoq.
- Tamatta piginneqataanerput Nunatsinnullu akisussaaqataanerput aatsaat taamaaliornitsigut qulakkiissavarput, Siumut Partiip ukiortaami pilluaqqussutini naggaserpaa.
