Siumut kommuninut 50 millioni koruuninik aningaasaliinerujumavoq

Tamakkuupput naalakkersuisunut illuatungiliuttut Siumukkut 2010-mut aningaasanut inatsisissanut siunnersuutigerusutaat.

Siumup katillugit 415 millioni koruunit aappaagumut ilassutitut aningaasaliissutigerusuppai. Aningaasat ilaatigut Nukissiorfiit namminersortunngorsarneqarneratigut aaneqarsinnaasut Siumup siulittaasuata Aleqa Hammondip oqaatigaa.

- Aallerfissatut pingaarnertut pingasut taavagut. Siulleq pingaaruteqartorujussuuvoq, Nukissiorfiit akitieselskabinngortinneqarnissaat. Ukiut tamaasa inuiaqatigiinni nukissiuuteqarnerup inerisarneqarnerani aningaasaliissutissat ukiumiit ukiumut nikerartartutu aallaavigiinnarnagu, Aleqa Hammond oqarpoq.

Siumut isumaqarpoq Nukissiorfiit namminersortunngortinneratigut landskarsip aningaasat 278,2 millioni koruunit allanut atorsinnaalissagai. Nukissiorfiit saniatigut aanaartugassanut aningaasaateqarfimmiittuutit 100 millioni koruuninik ilanngarnissaat kiisalu raajanut qaleralinnullu kiilumut 50 øremik qaavatigut akitsuusiineq katillugit 415,2 millioni koruuninik aningaasaliissuteqarsitsilissasoq oqaatigaa.

- Nukissiorfiit nammineq kivissinnaavaa - aningaasaqarnikkut patajaatsumik inissisimavoq aamma pilersaarusiorsinnaavoq. Namminersortunngorsaanerup aamma aqqani isumaqarpugut inuiaqatigiit Nukissiorfiit aktieselskabinngortinnissaanut piareersimasut, oqarpoq.

Namminersornerup eqqunneqarnera inuiaqatigiinnut toqqissisimanartumik neriunartumillu atorneqassappat, inuiaqatigiit ima aamma misigisimasariaqarnerarpai:

"Torrassuaq, aningaasanut inatsit uagutsinnut periarfissiisoq, inuiaqatigiinnut sulilersitsiniartoq, inuiaqatigiinnik akuulersitsiniartoq aamma inuiattut alloriaqqinnissatsinnut aqqutissiuussisoq", Siumup siulittaasua oqarpoq.

Nunaqarfimmiut illoqarfimmut nuuginnarnissaannik paasineqarsinnaasumik naalakkersuisooqatigiit aningaasanut inatsisissatut siunnersuummimmi oqariartuutaat illuatungiliuttut aamma uparuarpaat.

- Nunaqarfinni sanaartornissaq unitsinneqartussaq aamma kommunerujussuit ingerlarqqinnissaaminnut piariaqartitsitsisut sipaarfigineqassanngillat. Killormuanilli 2013-ip tungaanut immikkut pisariaqartitatik aallaavigalugit tunineqartariaqarput, oqarpoq.

Naalakkersuisut aamma sumi najugaqarnissaq aqunniassanngikkaat pingaartippaat.

- Pingaaruteqarpoq innuttaasoq kujataaniikkaluaruni, avannaaniikkaluaruni, aalisarnermi nunalerinermi inuussutissarsiuteqaraluaruni, ilinniartuugaluaruni imaluunniit ilinniarsimasuunngikkuni aningaasanut inatsimmi sullinneqartussaavoq. Inatsimmi takuneqarsinnaasariaqarpoq tamatta assigiimmik innuttaasuserput ataqqineqarluni sulissutigineqartoq, Aleqa Hammond naggasiivoq.

Siumup siunnersuummini aningaasaliiffissat immikkoortunut arfineq-marlunnut agguarpai.

Meeqqanut ilaqutariinnullu tunngatillugu 35 millioni koruunit iluanni meeqqamut 18-iliinissaata tungaanut ukiumut ileqqaakkat atatiinnaqquaat. Peqqinnissaqarfimmut 42 millioni koruunit ilaatigut suliaritinniarlutik utaqqisut ikilisinnissaanut atorneqassapput. Siusinaarluni soraarnerussutisiallit 37 millioninik utoqqalinersiallillu 2011-imiit 85 millioni koruuninik aningaasaliineruffiussapput. Kulturi, ilinniarneq timersornerlu 60 millioni koruuninik immikkoortitsiffiunissaat aamma avatangiisinik nakkutilliinermut, sumiiffinnilu radioqarnermut TV-qarnermullu 21 millioni koruuninik atuinissaq siunnersuutigaat. Siunissami iluaqutigilerumaagassanut 205 millioni koruuninik - ilaatigut inuussutissarsiutinut qularnaveeqqusiisarfiup pilersinneranut 75 millioni koruuninik aamma sinerissap qanittuani aalisarnermut, nunaateqarnermik uumasuuteqarnermillu siuarsaanissanut kiisalu nukissiuutinut ataavartunut aningaasaleeqqusipput.

Siumup aappaagumut aningaasanut inatsisissatut siunnersuutaani aamma naalagaaffimmit suliassaqarfiit ataatsiakkaat nunatsinnit tiguneqartussatut taasat tassaapput: Inuussutissalerineq nersutillu nakorsaaqarneq aamma aatsitassanut tunngasut. Naalakkersuisooqatigiit 2010-mut aningaasanut inatsisissatut siunnersuutaat tallimanngormat saqqummiunneqartoq, inatsisartut ukiaanerani ataatsimiinnertik septembarip ulluisa 25-anni aallartippassuk oqallisigineqassaaq.