Siumut: Kalaallit Nunaata piumasaqaatai Socialdemokratit paasisariaqarpaat
Siumup Folketingemut qineqqusaartitaa Siumumilu siulittaasup tullia siulleq Doris Jakobsen ima oqarpoq:
- Oqaatigivarput naalakkersuisooqatigiit nutaat pilersinneqarnissaat siumut tapersersorai, kisianni tapersersuinerput tamakkiisoq pitinnagu qulakkeerusupparput, aammalu kaammattuutigalugu, socialdemokraatit aasaanerani ataatsimeersuarnissaani Siumut peqataatitaqarnermini, isummaminik ersarissunik annitsissasoq. Tassalu nunarput nammineerluni siunissami uuliasiornerni arfattassanilu allanullu tunngatillugu akisussaanerat taanna pinngitsoorani qulakkeersimaneqartariaqartoq, Doris Jakobsen oqarpoq.
Socialdemokraatit aasaanerani ataatsimiilerpata Siumumiit naqissuserneqassaaq, Socialdemokratit SF-ilu nunarput pillugu suliani akerliuniaannaratik pilliuteqartariaqartut:
- Socialdemokraatit aasaanerani ataatsimiittussaapput, tassungalu anngunniarparput Dan Jørgensenip uuliasiornermi akerliunera aammalu SF-kkut uuliasiornermut aammalu arfattassiissutinut akerliuniarnerat pillugu, uagut nunatsinninngaanniit tamakkua akuersaarsinnaanngikkigut. Aammalu suleqataassagutta pilliuteqartariaqartut uagutsinnullu tapersersuinertik tamakkiisoq takutittariaqaraat, Doris Jakobsen oqarpoq.
Kisianni Doris Jakobsenip naqissuserpaa, Siumut folketingemut qinigaatitaqassagaluarpat, Socialdemoratit siulittaasuat, maannalu illuatungiliuttut siuttuat, Helle Thorning Schmidt statsministeritut toqqarniarlugu:
- Siumuminngaanniit ersarissumik oqaatigiuaannartarparput Helle Thorning Schmidtip statsministeritut ikkunneqarnissaa taanna uagut tapersersorlutigu, Doris Jakobsen oqarpoq.
Kisianni Dan Jørgensenip Siumut politikkianut akerliusumik nalunaarutai unitsinneqanngippata, Helle Thorning Schmidt statsministerissatut Siumumiit suli tapersersuinnassanerpaat?
- Tassami taamaaginnartoqassappat nikeriartoqassanngippat, kisianni Siumumiit ilimaginngilarput, Socialdemokraatit tamakkiisumik isumaat ersarissoq aammalu uagutsinnut tamakkiisumik tapersersuinerat iluatsilluarumaartoq. Tamannalu iluatsissanngippat soorunami nalilersuinerput ingerlaqqikkumaarpoq, Doris Jakobsen oqarpoq.
