Siumut: Ilinniarluarsimasut amerlanerusut angerlartariaqarput
Nunanut allanut tunngasunut politikimi sunniuteqarnerulernissaq, inuuniarnermikkut ajornartorsiortunik sullissilluarnerunissaq aamma kalaallit ilinniarluarsimasut amerlanerusut Nunatsinnut angerlarsinnaanissaat.
Siumup Folketingimut qinigassanngortitaasa sisamaasut sulissutiginiagaat ilaatigut tamakkuupput.
Siumup qinigassanngortitai tassaapput Erik Jensen, Sisimiut, Pitsi H.Høegh Qaqortoq aamma Aleqa Hammond aamma Martha Abelsen Nuummeersut.
Kingulliulluni taaneqartoq ilisimaneqartutut KANUKOKA-mi siulittaasuusimavoq.
Martha Abelsenip Nunatta Danmarkimi ilisimaneqarnerulernissaa ilaatigut qineqqusaarutigaa aamma kalaalerpassuit sooq Danmarkimut nuuttarnersut misissuiffigerusullugu.
Kalaallit Danmarkimi qaffasissumik ilinniagaqartut amerlanerusut ilinniakkaminnik naammassinnereeraangamik Nunatsinnut utertarnissaat Martha Abelsenip aamma kissaatigaa.
- Nunatsinniit ilinniagaqariartortut assigiinngitsorpassuarnik ilinniagaqartarput. Aningaasarsiornerup iluani, inuussutissarsiornikkut ineriartortitsinerup iluani, peqqissutsimik sullissinermi, assigiinngitsunillu ilinniariartorlutik Danmarkiliaraangata, ilisimagilaat atorluarlugit minnerunngitsumillu aamma Nunatsinni ilinniarfioreersut qaninnerusumik taakku ilisimalikkat atorluarlugit angerlarnissaminnut malinnaatinneqarlutillu, atorfissaqartinneqarlutillu aallaqqaammulli ilinniaqqaalernerminniit pissarsiaasa Nunatsinni atorluarneqarnissaat uanga sulissutiginiakkama ilagivaat, Martha Abelsen ilaatigut taama oqarpoq.
Danmarkimi naalakkersuisoqatigiit Socialdemokratinit siuttuuffigineqartut Siumup ukiuni kingullerni sisamani qanittumik suleqatigai, aamma Savalimmiormiut peqatigalugit Atlantikup Avannaamiut Suleqatigiiffianni peqataanissaq kissaatigineqarani.
Tamatumunnga atatillugu Nunatsinnut iluaqutaassappat allannguuteqartoqarsinnaanera Martha Abelsenip ammaffigaa.
- Isumaqarpunga Nunatsinnut iluaqutaasinnaasut, suleqatigiiffiuppata imaluunniit suleriaatsimik allannguinissamut tunngaviliisuuppata mattutinngilakka, aallaqqaataaniillimi oqarnianngilanga ima ittunik suleqateqarnianngilanga, kisianni Nunatsinnut iluaqutaasinnaasut suugaluartulluunniit pilersinnissaannut ammallunga qineqqusaarpunga aamma qinigaassaguma tamakkuninnga Nunatsinnut iluaqutaasinnaasunik suugaluartunilluunniit suleqatigiinniarlutik aallarnisaaniartunut mattussuinngilluinnarlunga, Martha Abelsen naggasiivoq.
Siumup saniatigut IA aamma Atassut folketingimut qineqqusaartitassaminnik saqqummiussereerput.
Demokraatit qinigassanngortitassatik aqagu nalunaarutiginiarpaat.
Partii Naleraq aamma Partii Inuit qinigassanngortitassaminnik qaqugu saqqummiiniarnersut suli paasinngilarput.
