Siumut: Erninermi sulinngiffeqartarneq angajoqqaat aveqatigiittariaqarpaat
Meeqqat aallaqqaataaniilli toqqissisimasariaqarput taamaattumik Kalaallit Nunaanni ernisimanermi sulinngiffeqartarneq sivitsorneqartariaqarpoq, Siumut taamatut isumaqarpoq. Siumut sinnerlugu inatsisartuni ilaasortaq Doris Jakobsen nassuiaavoq: - Danmarkimi ernisimasut sapaatip-akunnerini 52-ini sulinngiffeqartarput, Nunatsinnilu aamma sapaatip-akunneri 50-it sinnerlugit sulinngiffeqartoqartalernissaa uanga kissaatigaara, Doris Jakobsen oqarpoq. Kalaallit Nunaanni ataatanngorlaat massakkut sapaatip-akunnerini pingasuni sulinngiffeqarsinnaasarput, tamannalu inatsisartuni ilaasortap sivikippallaartutut isigaa. - Ernisimanermi sulinngiffeqartarneq ataataasup anaanaasullu aveqatigiittarsinnaasariaqarpaat. Imaassanngilaq anaanaasut akisussaaffik anginerusoq tigusassagaat, taamaattumillu aamma isumaqarpugut erninermi sulinngiffeqartarneq angajoqqaajusut aveqatigiissinnaasassagaat, Doris Jakobsen Sermitsiamut oqarpoq.
