Siumut: Demokraatit suleqatigiinnissamut ajoqutaapput

- Assigiinnarpaa Danmarkimi socialdemokaatit aamma SF imminnut avissaarlutik Socialdemokraatit Venstret suleqatigilerpatigit, Karl Lyberth oqarpoq.

Taanna isumaqarpoq Demokraatit qulangersimannittut Inuit Ataqatigiit politikkiminnik ingerlatsisinnaajunnaarsillugit.

- Aningaasanut inatsisissaq qiviarutsigu Demokraatit politikkiat erseqqilluinnartumik ingerlanneqarpoq, Karl Lyberth oqarpoq.

Tassalu demokraatit ilaanngikkaluarpata aningaasanut inatsisissaq IA-mit Siumumillu sanarfineqarsinnaangaluartoq, Karl Lyberth isumaqarpoq.

- Nalunnginnakku immitsinnut ungasissorsuunngikkaluarluta, Karl Lyberth oqarpoq.

Aamma Inuit Ataqatigiit aningaasaqarneq pillugu oqaaseqartartua Naaja Nathanielsen oqarpoq partiini Siumullu imminnut qanittuusut.

- Partiit assigiinngitsut siunertaat atuaraanni Siumumut qanittuunerput nalornissutigineqarsinnaanngilaq, Naaja Nathanielsen oqarpoq.

Taamaattorli oqartariaqarpugut ullumikkut naalakkersuinikkut ingerlatsinermi pissutsit taamaanngimmata, Naaja Nathanielsen oqarpoq.

Taanna oqarpoq IA Demokraatillu suliat anguniakkat maanna eqqumaffiginerugaat, partiit arlariillutik naapeqatigiissutissanik ujarlernerarlugit.

Demokraatit siulittaasuata tulliata Palle Christiansenip tassuuna isumaqatigaa.

- Imaassinnaavoq tunngaviusumik eqqarsartaatsivut assigiinngitsuusut, kisianni naammasisniakkavut assigiipput, taamaammat naapiffissarsiortarpugut, taava apeqqutaanngilaq tunngaviusumik assigiissuteqarneq, Palle Christiansen oqarpoq.