Siumut Demokraatinut qaninniarpoq

Siumup illuatungiliuttut Demokraatit qaninnialerpaat, taama aviisi Sermitsiaq allappoq.

Naalakkersuisooqatigiit isumaqatigiippallaarunnaarnerat eqqorlugu, mianersulaartumik naapeqatigiinniarnertut, aviisip nalilerpaa. Naalakkersuisooqatigiinnissamullu suleqatigiinnialersaarnerunersoq nalorninartoq, aviisi allappoq. Siumulli kissaatigigunarpaa, inatsisartuni sulinermi Demokraatit suleqatiginiarnissai.

Raajat pillugit nalunaarut pissutaalluni, IA-p Atassutip Siumullu naalakkersuisooqatigiinnerat nalorninartorsiorfiulerpoq, nalunaarullu taanna aappassaaneerneqarluni inatsisartuni ullumi eqartorneqartussaavoq.

Raajanut nalunaarut ukioq kingulleq atuuttoq, siumup Atassutillu uterfigeqqikkusuppaat, akerlianilli raajanut nalunaarut nutaaq, ukioq manna atuutilersimasoq, IA-p atuinnarusullugu.

Siumup Demokraatinut saaffiginnisimanera pillugu Demokraatini siulittaasup oqaaseqarfigerusunngilaa.

- Naalakkersuisooqatigiinneq isasuussagaluarpat, Demokraatit qanoq iliuuseqassanersut piareersarniarlugu, Demokraatit siuttui ullaaq manna arfineq pingasut-qeqqanut naapeqatigiissamaarnerartut, Per Berthelsen oqarpoq.

Hans Enoksen-ili radioaviisimut oqarpoq, raajanut nalunaarut ullumi inatsisartuni eqqartorneqalerpat, Naalakkersuisooqatigiit isumaqatigiillutik taaseqatigiikkumaartut.