Siumut, Atassut Partii Inuillu suleqatigiilerput

Siumup naalakkersuisunngortitsissamaarnermini suleqatissatut toqqakkani, Nikku Olsen, Partii Inuit aamma Gerhartd Petersen, Atassut sanimini issiaqatigalugit suleqatigiinniarnermik isumaqatigiinnertik tamanut tusarliuppaa.

Tusagassiortunik katersortitsinerup klingorna radioaviisimut Aleqa Hammond ima oqarpoq.

- Naalakkersuisooqatissatsinnik toqqaanerput nuannaarutigaara. Tamanna siulersuisuunerit aamma isumaqatigiinniaqatigiittuusugut isumaqatigiinnitta tamanna inerneraa. Isumaqarpungas suleriaqqinnissatsinnut maanna tunngavissaqalerluta.

Siumup siulittaasua. Aleqa Hammond taama oqarpoq.

Partii Inuit siullerpaamik Inatsisartunut qineqqusaartut marlunnik ilaasortaateqalerput, tassalu taakku naalakkersuisooqatigiinnut ilanngullutik. Aleqa Hammond radioaviisimit aperaarput, partii nutaqqatut oqaatigineqarsinnaasoq qanoq suleqatigineqassanersoq, Aleqa Hammondilu ima akivoq.

- Partii Inuit nutaatut Inatsiartunut isernerat pingaaruteqanngilaq, pingaarnerpaavoq inuiaqatigiit taasinermikkut isertsimmagit. Tamannalu pisussaaffiliivoq suleqatigiinnissamut.

Siumup siulersuisuunerisa isumaqatigiinniarnerit ingerlanneranni, partiit tamarluinnaasa oqaloqatigisarpaat aamma Inuit Ataqatigiit, tassalu maanna taakku illuatungiliuttuulersussaapput, tamanna pillugu Aleqa Hammond ima oqarpoq.

- Inuit Ataqatigiit illuatungiliuttunngornerisa kingorna suleqatigiiffissarpassuaqartoq, Siumumit takorloorsinnaalluarparput, Inuit Ataqatigiillu oqaloqatigiittarsimanitta tamanna takutippaa. Taamaattorli tunngaviusumik isummernerit pissutigalugit suleqatigiissinnaasimanngilagut.

Siumup siulittaasua, Naalakkersuisullu siulittaasussaat, Aleqa Hammond taama oqarpoq.

Atassut ukiuni sisamani kingullerni naalakkersuisuutitaqarsimanngitsoq, maanna naalakkersuisunngortitaqarnissaminnut qaninnerulerput, tamannalun siulittaasup, Gerhardt Petersenip nuannaarutigaa.

- Naalakkersuisunngortitseqataasinnaagatta nuannaarutigaara. Qineqqusaarnerup nalaani takusinnaasimavarput Siumukkullu qineqqusaarutigut assigiissutilerujussuusut soorlu, aatsitassat annissukkat akileraarusersorneqarnissaat, aatsitassat uranitallit piiarneqarsinnaanissaaq aamma aalisarnermut apeqqutit tunngasut qineqqusaarnitsinni assigiimmik oqariartuutigisimallyutigit.

Atassutip siulittaasuata, Gerhardt Petersenip partii suleqatigiligassami, Partii Inuit politikkiisa ilaat tassaasoq, Nunatta Danmarkimiit tuaviornerpaamik anissaa pillugu politikkeqarnerat ernumanartoqartinngilaa, Gerhard Petersen tamanna pillugu ima oqarpoq.

- Namminersulivikkiartuaarnissaq pillugu 2009-mi taasisoqarmat tamanna uangut peqataaffigaarput isumaqatigalugu. Taamaattumik Partii Inuit suleqatigfiniarnerat ajornartorsiutaanngitsutut isigaarput, Gerhardt Petersen taama oqarpoq.

Partii Inuit siulittaasua, Nikku Olsen tupinnanngitsumik nuannaaqisoq radioaviisimut imaattumik oqarpoq.

- Inuit qinersineri ataqqivagut, taamaattumik nuannaarutigaara qinerneqarlyarsimanerput maluginiarparalu nunaqarfinni tamani qinerneqarsimanera. Taamaattumik pingaaruteqarpoq Nunat tamakkerlugu sullissisoqassasoq tassalu tamanna naalakkersuisunngortitsinitsini angusarput.
 
Nikku Olsen taama oqarpoq suullu sulissutiginiarnerlugit imaattumik oqaaseqarluni.

- Inuiaat kalaallit nukittullutik namminersulivikkiartuaarnissaannut aqqutissaq naalakkersuisooqatigiilernitsinni ersarinnerulerpoq.

Partii Inuit siulittaasuat, Nikku Olsen taama oqarpoq.