Siumut: Akiligassallit akiliissapput
Akiligassallu arriippallaamik akilersorneqartarput.
Taama isumaqarpoq Inatsisartuni ilaasortaq Siumumeersoq Karl Lyberth, taamaattumik taassuma kissaatigaa akiliisitsiniartarneq suliffeqarfimmit namminersortumit ingerlanneqalissasoq.
- Suliassaq tamanna pisortat artoraat nassuerutigisariaqarparput, tassami innuttaasut akiligassaat ikiliartunngimmata, Karl Lyberth oqarpoq nangillunilu:
- Innuttaasut akiligassaat suliffeqarfiit namminersortut ikileriartissinnaassagaat qularinngilara.
Taassuma ilaatigut takorloorpaa taakkua akiliisitamik annertussusaat apeqqutaatillugu procentisisarneq atorlugu akissarsiaqartinneqarsinnaasut.
Nunatsinni innuttaasut tamarluinnarmik agguaqatigiissillugu 17.500 koruunit sinnerlugit akiligassaqarput.