Siumut aamma Inuit Ataqatigiit minutsini 18-ini naapisimaarput
- Imatut oqassuunga, maanna killigisarput eqqarsaatigalugu, naalakkersuisooqatigiilernissamik pimoorussilluni isumaqatigiinniarnertut ataatsimiinnerput oqaatigineqarsinnaanngimmat. Apeqqutit avissaarutigigut sukkut naaperiaaffigisinnaallutigit eqqartueqatigiiffigivagut aamma Siumukkut apeqqutit uangutsinnut saqqummiussaat akiortorpagut. Naatsorsuutigaaralu akissuteqaatigisagut Siumukkunnit eqqarsaatigilluarneqarumaartut, Kuupik V. Kleist taama oqarpoq.
Oqaloqatigiinneq apeqqutinik akimmiffiusunik eqqartueqatigiiffiusoq Inuit Ataqatigiit siulittaasuata oqaatigaa, soorlu qineqqusaarnermi aporaaffiusimasut, aatsitassarsiornermut tunngasut, qinngornernut ulorianartunik tunngassuteqartut aamma aalisarnermut tunngasut eqqartorneqarlutik.
- Apeqqutinut ataasiakkaanut tunngatillugu suut avissaarutaanerpaanersut maanna oqaatigisinnaanngilara, kisianni qitiusoq unaavoq, Inuit Ataqatigiinnut pingaaruteqarluinnarmat Nunatsinni aningaasarsiornerup piaartumi alloriarfiunissaa aamma suliffissanik nutaanik pilersitsiortortoqartariaqarnera pingaartillutigu qitiulluinnarneralu Siumukkunnut oqaatigalutigu. Naapeqqinnissatsinnik Siumumit neriorsorneqarpugut attaveqarfigineqaqqissalluta allakkiavut atuarluarneqareerpata.
Inuit Ataqatigiit siulittaasuat, Kuupik V. Kleist taama oqarpoq.
Inuit Ataqatigiit allattoqarfiani atorfilik, isumaqatigiinniarnermilu ullaaq peqataasoq Johan Lund Olsen, t-shirtimik 'urani naaggaarpara'-mik allassimasumik atukkerluni isumaqatigiinniaqataasoq, Siumukkunnit maluginiarneqarsimavoq, Siumullu siornersortaanit, Julie Rademacher-imit oqaatigineqarpoq, tamanna Siumumut oqariartuutitut paasineqarsinnaasoq.
Partiit tulliit Siumumit naapinneqartussaq taassaapput Partii Inuit, taakkulu ualeru nalunaaqutaq marlunut naapinneqassapput.
