Siumut aalajangersimaannartoq: Nunatta kujataani innuttaasunik ataatsimiititsinissat kinguartinneqartariaqarput

Kuannersuit pillugit innuttaasunut ataatsimiititsinissat unitsinneqarnissaanut Siumup tassanngaannartumik nalunaaruteqarnera Demokraatit kamaatigaat.
Innuttaasunik ataatsimiititsinissat Greenland Mineralsip piiaanissamut akuersissuteqarfigineqarsinnaanissaanut pingaaruteqarluinnartup ilagaat. Taakku kinguartinneqassappata suliap ingerlanera tamarmik kinguaattuussaaq. Assi © : KNR / Malik Brøns
januaarip 29-at 2021 18:17

Ataasinngorpaatinnagu nutaarsiassaqanngilaq.

Siumup siulittaasuata tullia, Vivian Motzfeldt nunatsinni politikkikkut ullualuit pissanganartut kingorna oqarpoq.

Nunatta kujataani innuttaasunut tallimanngornermi februaarip tallimaanit ataatsimiititsinissamut sapaatip akunneraannanngornera pissutaavoq. Innuttaasunut ataatsimiititsinissat Kuannersuarni aatsitassarsiornissamut suliniummut oqallisaangaatsiartumut tunngavoq, tassani aatsitassarsiutileqatigiiffik Greenland Minerals aatsitassanik qaqutigoortunik uranimillu piiaarusuppoq.

AAMMA ATUARUK Naalakkersuisut Kuannersuit pillugit qaartartumeerinissamik siorasaarinermik tigusaqartut

Innuttaasunut ataatsimiititsinissat kinguartinneqarnissaat Siumup sapaatip akunnerani matumani tassanngaannartumik siunnersuutigaa, naak Siumut aatsitassarsiornissamut suliniummut ukiorpassuarni illersuisuugaluarluni.

Kuannersuarni aatsitassarsiorfik pillugu paasissutissat piviusut:

  • Kuannersuit Narsap kilometerinik 7,5-inik ungasitsigisumi avannarpasissortaaniippoq.
  • Aatsitassarsiorfik asimi 700 meterinik qutsitsigisumiipppoq.
  • Greenland Mineralsip aatsitassarsiorfk ukiuni 37-ni piiaaffiginiarpaa.
  • Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
  • Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
  • Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
  • Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.

Tusarfik: Pinngortitaleriffik aamma Nationalt Center for Miljø og Energi, IPN-iliaq.

Innuttaasunik ataatsimiititsinissat Greenland Mineralsip piiaanissamut akuersissuteqarfigineqarsinnaanissaanut pingaaruteqarluinnartup ilagaat. Taakku kinguartinneqassappata suliap ingerlanera tamarmik kinguaattuussaaq.

Demokraatit siorasaarisut

Tamanna pissutigalugu naalakkersuisooqatigiit partiivinit Demokraatit naalakkersuisooqatigiinnit tunuarnissamik siorasaaruteqarput.

Demokraatinit Jens-Frederik Nielsenip sammivimmik allannguisoqarnera ernumanermik annertuumik pilersitsisoq Sermitsiamut oqaatigaa.

- Anoraa maliinnarlugu politikki ingerlanneqalissappat, uanga allatut iliorsinnaajunnaassaanga taamatut ingerlatsisoqarnera Demokraatit peqataaffigissanngikkaat innersuussisariaqalissaanga, Jens Frederik Nielsen aviisimut oqarpoq.

Taanna aatsitassanut aamma naalakkersuisuuvoq.

AAMMA ATUARUK Ilisimatooq Naalakkersuisuni isumaqatigiinnginneq pillugu: Ikinnerussuteqartoqalinngikkuni qinersisoqassaaq

Taamaalilluni naalakkersuisuni isumaqatigiinnginneq annertuneruvoq, naalakkersuisunilu sapaatip akunneranut ataatsimiittarneq Kuannersuit pillugit oqallinnermik ullumi aamma aallartinneqarpoq.

Innuttaasunulli ataatsimiititsinissat kinguartinneqassanngitsut, Jens Frederik Nielsenip tallimanngornermi ualikkut nalunaarutigaa.

Siumut ataasinngorpat ataatsimiissasoq

Naalakkersuisooqatigiinnit Siumumit siulittaasup tulliata Vivian Motzfeldtip innuttaasunut ataatsimiititsinissamut piffissaliussatut pilersaarutit kinguartinnagit maliinnarnissaannut aalajangerneq kukkusuunerarpaa:

- Innuttaasut kujataanilu qinikkat oqariartuutaat avaqqutiinnassallugu pissusissamisuunngitsoq isumaqarpunga, Vivian Motzfeldt naalakkersuisut ataatsimiititsiinnarniarlutik aalajangernerata kingorna KNR-imut oqarpoq.

Siumup Inatsisartuni gruppiat ataasinngorpat ataatsimiissaaq suliamillu taassuminnga oqallisiginnissallutik.