Siumup oqaaseqartittagaa isornartorsiorneqangaatsiarpoq
Siunnersuut amerlanerussuteqaqqatartumik Inatsisartut upernaaq ataatsimiinneranni akuersissutigineqartoq, tusarniaassutigineqareerpoq. Tamannalu aalisakkanut ilisimatuunit, peqatigiiffinniit parteeqataanillu allaat aalisarnermut Naalakkersuisumit, Finn Karlsenimik isumakululersitsivoq, Krusellu politikeritut matumani siunnersuusiornissamut piukkunnassussaa naleqquttutut isigineqarani.
Allaat politikeritut inuiaqatigiit soqutigisaasa taavalu illuanik nammineq inuttut aningaasarsiornikkut soqutigisaminik immikkortitsisinnaanermik piginnaasaqarunnaaqqasoq arlalinnik oqaatigineqarluni.
Inatsisartuni upernaakkut ataatsimiinnerisa nalaanni ullut kingulliit ilaanni siunnersuut saqqummiummagu annilaartoqarpoq, qaleralinniarnermut aningaasanik iluanaarfiungaatsiartumut annertuumik allannguutaasussanik siunnersuuteqarmat illuatungiliuttuniit assut akerlilersorneqarpoq. Maanna aqutsiveqarfiusuni Qeqertarsuup tunuani, Uummannami Upernavimmilu millisaangaatsiarnissamik oqaluttut sinniisaattut imminut inissippoq.
Tassalu aalisartut illoqarfinni nunaqarfinnilu ataasiakkaani killeqanngitsumik qaleralinniarsinnaanngorput.
Naak illuatungiliuttuniit akerlilersorneqangaatsiaraluartoq, Karl Kristian Kruse Siumumeersup siunnersuut amerlanerussuteqaqqatartumik akuerisaatippaa - tassa Atassummit, Siumumit kiisalu partiinit ataasiinnarmik ilaasortaatitaqartunit marlunnit, Partii Inuinnit Partii Nalerarmillu.
Mianersoqqussutilli ikinngillat. Pisassiissutissatut Pinngortitaleriffimmiit 20.300 tonsit inassutaagaluartut, upernaarli 6.000 tonsinik sinnereerlugit pisaqartoqareerpoq.
Siunnersuut, Nunatsinni qaleralinniarnerup MSC-mik meqqilernissaanik, aalisarnermi inuussutissarsiortut kissataat unitsitsissammat, ileqimisaartuutaavoq.
Qaleralinniarnerullumi nungusaataannginnissaanik apeqqut aalisakkanik ilisimatuut inuussutissarsiortullu siunnersuummut naaggaarnerannut peqqutaarpiarpoq.
Allaat Finn Karlsenip siunnersuut akuerinngilaa. Isumaqatiginngilluinnarpaa.
Radioavisimulli oqaatigitsiarneratut: Qanoq ikkaluarpalluunniit, Inatsisartut aaliangigaat malittariaqarpakka.
- Taamaammat tamanna pissutigalugu tunuarnissara naatsorsuutiginngilara, Finn Karlsen oqarpoq.
Nalorninartutuarli tassaavoq, Karl Kristian Krusep akerlerineqangaatsiartumik siunnersuuteqarneranut suna tunuliaqutaanersoq. Tassanilu oqqat ipittut eqqartuipput. Karl Kristian Kruse aalisartuuvoq. Niaqornanilu, siunnersuummik iluaqutigineqangaatsiartussami najugaqarpoq, aalisakkanillu suliffissuaateqarfimmi KNT-mi siunnersuutigineqartumIttaaq iluaquteqartussami piginneqataalluni.
Kisianni tamakkuninnga tikkuartuineq taamaassorinninerinnaapput. Inatsisartut Qinigaasinnaanermut Ataatsimiititaliaat tamanna pillugu misissueqqissaassanersut paasinarsiumaarpoq.
Inatsisartunilu amerlanerussuteqalaartut pisoq eqqarsaatigilluassaneraat, aamma nalunaarummik ukiaaneranilu ataatsimiinnermi allanngortisinissaat periarfissaavoq - qanorli inerneqarumaartoq piffissap takutikkumaarpaa.
