Siumup Alcoamut tapersersuinera aalaqqajuppoq
![](/sites/default/files/styles/image_934x467/public/article_images/alcoaskilt_630_3.jpg?itok=hCd67sXf)
Tamanna erserpoq ingerlatsivissuit annertuut pillugit Naalakkersuisut Inatsisartuni sapaatip akunnera kingulleq naalersoq saqqummiussimmata.
- Suliniutit angisuujuppata mikisuuppataluunniit Kalaallit Nunaannullu iluaqutaassappata Siumumit oqaloqataaffigissavagut. Aningaasaqarnikkut, suliffeqarnikkut avatangiisinut peqqissutsinullu oqariartuutit apeqquteqaatinullu tunngavilersuutit suli tamakkeqqajarneqanngillat, Inatsisartuni ippassaq oqallittoqarnerani, pisumut Siumup oqaaseqartartua, Akitsinnguaq Olsen taama oqarpoq.
Taanna aamma oqarpoq Siumup pisariaqartikkaa paasissutissanik sukimiinerusunik pissarsinissaq, aatsitassaappata, uuliaappat Alcoa-llu aatsitsiviliornissaanut tunngappata.
Apeqqutit suli akissutissarsineqanngitsut, ilaatigut avatangiisinut tunngasut aammalu nunat allamiut suliartortut qanoq atugassaqartinneqarnerinut tunngasut, Siumumit utaqqimaarneqartut Akitsinnguaq Olsen oqarpoq.
- Nunatsinni inuiaat soqutigisaat aammalu aningaasaqarnikkut, avatangiisinut peqqissutsikkullu apeqqutit qulakkeerlugit aammalu suliareqqissaarlugit ingerlasoqarnissaa Siumumiit soqutigisaraarput, Akitsinnguaq Olsen oqarpoq.
Inatsisartuni oqallinnermi paasinarpoq, Siumup Inatsisartuni ilaasortai Alcoa pillugu assigiinngitsunik isumaqartut. Assersuutigalugu Kim Kielsen misigisimavoq, marlunnik siumut alloriartoqarpat ataatsimik utimut allortoqartartoq. Kim Kielsenilu misigisimavoq Siumukkut parteeqatini aalajangernaveersaartut.
Inatsisartuni oqalliseqataasut, Atassutip aamma Inuit Ataqatigiit aamma malugisimavaat, Alcoa pillugu Siumukkormiut marloqiusanik isummersortut.
Soorlu Aqqaluaq B. Egede-p oqallinnermi oqaatigaa, malugisimallugu Siumukkut ataatsimut isummernissaminnut nalorninartorsiulersut.
Atassummit Siverth K. Heilmannip oqaatigaa, siusinnerusukkut Siumup Alcoa-p aatsitsiviliornissaanik tapersersuisimagaluartut maanna illuatungaanut saassimagunartut.
Akitsinnguaq Olsenilu tamanna pillugu KNR-imut nassuiaavoq.
- Alumiiniuliorfissap pilersinneqarnissaanut Siumumi amerlanerussuteqartut isumaqataapput. Piginneqatigiissuteqarnissamut aalajangiinissat tamakkerlugit tunniunneqarnissaat aammalu avataaniit suliartortut pillugit Naalakkersut paasissutissiinissaat Siumumit qilanaaralugit utaqqissavagut, Akitsinnguaq Olsen taama oqarpoq.