Siumumit politikerit marluk sulinngiffeqarallartut

Siumumimi politikerit, tassa Karl Kristian Kruse Jens Danielsenilu, Inatsisartuni sulinngiffeqarallassapput. Taakku peqqissutsimikkut peqquteqarlutik sulinngiffeqarallassasut Siumut KNR-imut paasissutissiivoq.

Karl Kristian Kruse sapaatit akunneri sisamat sulinngiffeqarallassaaq, Jens Danielsenilu sapaatit akunneri marluk sulinngiffeqarallassalluni. Taakku suna peqqutigalugu sulinngiffeqarallarniarnersut Siumup allattaanerata Miki Jensenip itisilerusunngilaa.

AAMMA ATUARUK Anna Wangenheim Steen Lyngelu Inatsisartunit sulinngiffeqartut

Sinniisut: Suliassaqangaatsiassasut

Karl Kristian Krusep sulinngiffeqarnerani Mala Høy Kuko sinniisutut Inatsisartunut aggersarneqarpoq.

Taanna Tasiilami ulluinnarni ilinniartitsisuuvoq arfininngormallu Nuummukarpoq aqagu marlunngornermi Inatsisartunut ivertinneqassaaq:

- Sinniisuunera pissutaalluni inatsisartuni suliaqalerninnut aatsaat siullermiilinngilanga , arlalerialerpunga massakkut. Taamaammat suliassaqangaatsiarnissara naatsorsuutigaara, Mala Høy Kuko oqarpoq nangipporlu:

- Inatsisartutut akuerineqaqqaarlunga aatsaat isertinneqarsinnaavunga. Pikani ivertinneqaqqaassaanga aqagu marlunngornermi. Taava tassani akuerisaaqqaassaanga. Taava tassaanngaanniit suliassat tigussavakka.

Jens Danielsen sulinngiffeqarnerani Ineqi Kielsen sinniisuussaaq. Sinniisut taakku marluk Inatsisartut ukiaanerani ulapputileruttorneranni aggersarneqarput..