Siumumit politikeri eqqartuussivimmi: Toqutsinissamik siorasaaruteqarsimannginnerartoq
Aslak Jensen tungujortumik annoraaqarluni ilaquttani qaninnerpaat ilagalugit Eqqartuussisoqarfik Sermersuumi eqqartuussinissamut takkuppoq.
Aslak Jensen eqqartuussivimmi suliap aallartinnginnerani eqqissisimallunilu qiimavoq, ilisimannittutulli nassuaateqalerami misigissutsitigut sunnerneqarsimavoq.
Taanna Kommuneqarfik Sermersuup inunnik isumaginnittoqarfianut 2017-imi martsip 17-iani nalunaaqutaq 12:45-p missaani sianerluni isumaginninnermik suliaqartumut toqutsinissamik siorasaaruteqarsimasutut unnerluutigineqarpoq.
Aslak Jensen pinngitsuunerarpoq.
Eqqartuussivimmi suliaq kommunip taassuma ilaqutaanut tunngatillugu aalajangiuteqarsimaneranik tunngassuteqarpoq.
Aslak Jensen Kommuneqarfik Sermersuup isumaginnittoqarfianut sianersimanini eqqaamanerarpaa, siorasaaruteqarsimanngissorivorli.
Suliaq tamaat misissuiffiginiaraa
- Toqussavakkimmik oqarninnik eqqaamasaqanngilanga. Suliaq tamaat misissuiffiginiarlugu oqaatigaara, eqqartuussivimmi oqarpoq.
Nammineq naapertuuttuliornerunngitsutut isigisaminik misigisaqaraangami immaqa tamakkiisumik eqqarsanngitsoortarsinnaalluni nassuerutigaa.
Pisup kingorna ullualuit qaangiuttut politiinit killisiorneqarnermini Aslak Jensenip kamassimanini ersersippaa. Killisiuinermi nalunaarusiaq naapertorlugu ”taakku” ajortumeerniarpanni ”taakku” aamma nammineq ajortumiissallugit” oqaatigisimavaa - tamannali toqumik siorasaarinerunnginnerarpaa.
AAMMA ATUARUK Aslak Jensen pillugu eqqartuussut aalajangiiffigneqartussanngortoq
Unnerluussut naapertorlugu Aslak Jensen Kommuneqarfik Sermersuumi isumaginninnermik suliaqartumut 2017-imi marsip 17-iani oqarasuaatikkut ima oqarpoq: - Kinaanerit ujartussuakkit. Utaqqilaarit toqussuakkit.
Unnerluutigineqarsinnaannginnera atorunnaarsinneqartoq
Aslak Jensen Siumumit Inatsisartunut qinersinermi qinigaanerpaat pingajoraat.
Ukiakkut ataatsimiinneq aallartimmat Inatsisartuni ilaasortat allat taassuma unnerluutigineqarsinnaannginnera aorunnaarsippaat. Inatsisartunimi ilaasortat politiinit eqqartuussivimmiluunniit suliami unnerluutigineqaqqusaanngillat.
Tamanna Inatsit tunngaviusuni allassimavoq – taakkulu unnerluutigineqarsinnaannginnerata atorunnaarnissaanut – taamaalillutillu unnerluutigineqarsinnaanissaannut eqqartuunneqarsinnaanissaannullu – Inatsisartut taasissuteqaqqaartassallutik.
KNR-ip eqqartuussivimmi suliaq ullup sinnera malinnaaffigissavaa. Ullumikkut eqqartuussutip suaarutigineqarnissaa naatsorsuutigineqarpoq.