Siumumik suleqateqannginnissaq Kuupik Kleistip neriorsuutigaa

Inuit Ataqatigiit Siumukkunnik inatsisartunut qinersisoqareerpat suleqateqarnissartik mattuppaat. Inuit Ataqatigiit siulittaasuat Kuupik Kleist AG-mut ullumi taama oqarpoq.
Allattoq Mads Lynge
juunip 01-at 2009 16:43

Qineqqusaarnerup naajartulernerani Siumumiit saqqummiussorneqartut aallaavigalugit Kuupik Kleist taama aalajangiivoq, imatullu tunngavilersorpoq:

- Tusarliunneqartorpassuit, tusagassiuutitigullu saqqummiunneqartut eqqarsaatigalugit pissusilersuutit taamaattut peqataaffigisinnaanngilagut, aamma naalakkersuinikkut suliniaraanni isumaqarpunga tamakkua sakkussaanngitsut, Kuupik Kleist Radioaviisimut oqarpoq.

Qinersisartunut neriorsuutit piviusorsiunngitsut arlallit Siumumit saqqummiunneqartut Kuupik Kleistip oqaatigaa.

200 koruunilerlugu Nunatsinni sumulluunniit angalasinnaanermik neqerooruteqarniarneq piviusorsiunngitsutut nalilerpaa, aamma USA-mi Canadamilu efterskolersinnaanissamik neqerooruteqarniarneq tunngavissaqartinnginnerarlugu, efterskolimmi nunani taakkunani takussaanngimmata. Akikitsumilli timmisartuussisinnaanissamik neqeroorut piviusorsiunngitsutut nalilerneqaraluartoq inuiaqatigiit kalaallit angallannerulersinnaanissaannik Siumukkut oqariartuutaat nuannaarutissaannginnerami? Kuupik Kleist ima akivoq:

- Soorunalimi angallannikkut akikillisaanissaq pisariaqartupilussuuvoq aamma sulissutigisariaqarpoq, kisianni toqqaannartumik billetsit 200 koruunilerlugit pisisinnaanermik neriorsuineq piviusorsiornerunngilaq, Siumukkullu ilaasortaasa akornanni akerlilerneqartoq aamma paasivarput, kisianni aktieselskabinut akuliukkusunnertut uanga tusaavara. Taamaammat siulersuisuunernut inatsisartunilu ilaasortaatitassatsinnut innersuussutiginiarpara Siumukkunnik naalakkersuisoqatigeeqateqannginnissarput, Kuupik Kleist oqarpoq.