Siumumi siulittaasup tulliatut tunuassaaq
Wæver Johansenip nalunaarutigaa, Siumut nuna tamakkerlugu sapaatip akunnerata tulliani Sisimiuni ataatsimeersuarnissaanut siulittaasup tulliatut qinigassanngortinniarani. Aviisi Sermitsiaq.AG taama allaaserisaqarpoq
Jørgen Wæver Johansen Siumut nuna tamakkerlugu 2014-mi ataatsimeersuarmat siulittaasup tulliatut qinigaavoq, maannali polikkiunngitsumik suliaqarnissani piffissanngorsoraa.
- Maanna arlalinnik anguniagaqarpunga taakkualu pivisuunngortinneqarnissaannut periarfissinniarpakka.
AAMMA ATUARUK Kim Kielsen siuttuuvoq katersuuffiusoq
Suliffeqarfinnik arlalinnik Svend Hardenberg suleqatigalugu ingerlatarpunga, taakkualu anginerusunngorlugit ineriartortinneqarnissaat neriuutigaarput.
Assersuuutigalugu puilasup ernganik tunisassiorfik Imivik Qeqertarsuarmi Uunartuarsuup puilasuanit tunisassiorneq pineqarpoq, Jørgen Wæver Johansen aviisimut Sermitsiamut taama oqarpoq.
AAMMA ATUARUK Wæverip Siumup siuariarnera tulluusimaarutigaa
Kommunemut qinersinermi ukiormanna apriilip qaammataani Wæver Johansen parteeqatiminut Kiista P. Isaksenimut ajorsarpoq.
Partii Siumut nuna tamakkerlugu sapaatip akunnerata tulliani Sisimiuni ataatsimeersualerpat siulittaasunngorniuttoqassaaq.
Maanna Siumumi siulittaasoq Kim Kielsen aamma Naalakkersuisunut ilaasortaasimasoq Vittus Qujaukitsoq siulittaasumut qinigassanngortipput