Siumumi ilaasortaq: Qaasuitsoq marlunnut avinneqarli

- Qaasuitsup kommuniani suliassat ataqatigiissinnaanngilluinnarmata kommunip marlunnut avinneqarnissaa siunnersuutiginiarpara, Kristian Jeremiassen Siumut sinnerlugu kommunalbestyrelsimi ilaasortaq Qanoruumut oqarpoq.

Aqutsinerup Ilulissaninngaanniit annerpaamik ingerlanneqalersimanera, taamaasillunilu kommunimut saaffiginnissutit Ilulissanut innersuunneqartalersimanerat, Kristian Jeremiassenip isornartorsiuinerminut tunngavilersuutaasa ilagaat.

- Pisortat ingerlatsiviusut innuttaasunut qaninnerulernissaat siunniunneqarsimavoq, kisianni kommunit kattutereernerisa kingorna innuttaasunut sullissineq ungasillinerusimavoq, Kristian Jeremiassen oqarpoq.

Kristian Jeremiassen isumaqarpoq Naalakkersuisut kommuninut siorna 30 mio. koruuninik sipaaruteqarnerat tulluartuusimanngitsoq, soorlu allaffissornermut aappaagu sipaaruteqarniarnerat aamma pitsaanerpaanngitsoq.

- Naalakkersuisut kommunit qaninnerusumik suleqatigisariaqarpaat, taamaalilluni kattunnerup iluatsinnerpaaffissaa anguneqarsinnaammat, Kristian Jeremiassen isumaqarpoq.

Qaasuitsup Kommuniata qanoq avinneqarnissaa Kristian Jeremiassenip takorlooreerpaa:

- Kangaatsiaq, Aaasiaat, Qeqertarsuaq, Qasigiannguit Ilulissallu kommunitut ataatsitut. Kiisalu Uummannaq, Upernavik Qaanaarlu kommunip aappaattut, Kristian Jeremiassen oqarpoq.

Siunnersuut kommunalbestyrelsip novembarimi ataatsimiinnissaanut saqqummiunniarpaa.