Siumukkormiut siulittaasumut isumaqataanngitsut
- Oqallinnermut matooriniarsarinertut oqaluttoqarnissaa tulluarsorinngilara, Siumup siulittaasuanut ersarissumik kaammattuutingerusuppara oqallinneq ammasumik ingerlanneqarniarli, namminneq sassarnikuupput namminneq politikkikkut oqariartuutitik aviisitigut allatigullu ingerlatarinikuuaat, taava isummeqqusaanngilagut, Siumup Nuummi immikkoortortaqarfiani siulittaasoq, Inga Dora G. Markussen aperivoq?
Taanna Qeqertarsuarmi Siumup immikkoortortaqarfiata siulittaasuanit Kristian Brobergimit isumaqatigineqarpoq. Nunatsinni partiit annersaattut suut tamaasa oqallisigineqartuaannarnissaat pingaaruteqartoq taanna isumaqarpoq.
Siumup siulittaasuata siulittaasunngorniuunnissap oqallisigineqarnissaanik piffissaannginneraanera paasiuminaatsippaa.
- Sooq oqallisigissallugu piffissaanngitsoq oqassalluni eqqumiittoq isumaqarpunga, tamatigut piffissaajuaannarpoq , Kristian Broberg oqarpoq.
Siumut Maniitsumi siulittaasup, Jan Bollerip siulittaasussarsiornerup oqallisiginissaa aamma pingaaruteqartippaa.
- Piffissaqartariaqarpoq, qaapiaannarluni pineqarsinnaanngilaq. eqqarsaatigeqqissaarlugu anguniakkat allallu toqqammavigalugit pisoqartariaqarami aalajangiillunilu, Jan Boller oqarpoq.