Siumukkormiut: Siulersuisuunerit taarserlugit
Inatsisartut Aningaasaqarnermut Ataatsimiititaliaani Simon Olsenip siulittaasunngortinneqarnera Siumut partiitut tutsuiginassusianut annertuumik kingunerlutsitsivoq, taama sineriammi Siumut immikkoortortaqarfiini annerni marlunni siulittaasut naliliipput.
Siumut Nuup siulittaasuata Lars-Emil Johansenip siulittaasunngortitsinermi pisut eqqumiigai, Siumullu Qaqortumi siulittaasua Lars Lundblad oqarpoq pisut Siumumi siulersuisut taarserneqarnerannik kinguneqartariaqartut, siullermilli Lars-Emil Johansen ima oqarpoq:
- Taamatut pisoqarnera nammineq inuttut eqqumiigeqaara, minnerunngitsumik naalakkersuisuni ilaasortatut tunuarnera eqqarsaatigalugu. Aningaasatigut ajornartorsiutit peqqutigalugit tunuarmat, imaaliinnarlugu akuerineqarsinnaanngitsutut isumaqarfigaara. Lars-Emil Johansen oqarpoq.
Isumaqarnerarporlu minnerpaamik partiip qullersaqarfianit nassuiaasoqartariaqartoq Siumullu siulittaasua pisumut akisussaasuusoq.
- Partiip siulittaasuata kiisalu Inatsisartuni ilaasortatta pissutsinik naliliinerlunnerattut tamanna oqaatigisariaqarpoq. Partiimi ataqatigiinngitsumik ingerlatsineq sumulluunniit iluaqutaanngilaq, ukiunilu makkunani Siumumut nammakkersuinerit amerlaqisunut tamanna ilagaat, taamaattut amerliartortittariaqanngillat, aamma oqaatigisariaqarparput taama pisimasoqartariaqanngikkaluarpoq, Lars-Emil Johansen tunngavilersuivoq.
Siumut Qaqortumi siulittaasua Lars Lundblad tamatumunnga isumaqataavoq, isumaqarporlu Siumumi maannakkut pisut annertuumik sajuppillatsitsisut:
- Parteeqatitsinninngaanniik qullersaasunillu Inatsisartut Naalakkersuisullu sulinerannik erseqqissumik ilisimatinneqarneq ajoratta, tusagassiuutitigut malinnaavigasagut tunngavigaluagit isornartoqartitsivugut, taamatullu psiosqaqattaarnera innuttaasut akornaniinnaanngitsoq aammali Siumut iluani eqqissiviilliortitsivoq, Lars Lundblad tunngavilersuivoq.
Aningaasaqarnermut Ataatsimiititaliami siulittaasussarsiorluni pingasoriarluni taasisoqarsimanera pillugu aamma oqarpoq amerlanerussuteqarneq ataqqisariaqaraluartoq.
- Taamatut pisoqarsimanera aqutsisut sanngiissusiannik ersersitsivoq. Inummik aalajangersimasumik inissiiniarnertut isikkoqarami taannalu tulluarsorinanngilaq, Lundblad oqarpoq.
Siumut sinnerlugu inatsisartuni ilaasortanit 14-iusunit qulit Ruth Heilmann Aningaasaqarnermut Ataatsimiititaliami siulittaasussatut taasinermi siullermi taaguukkaat Simon Olsen arfineq-pingasunik taaneqarpoq. Kingorna taaseqqinnermi naligiimmata, pingajussaannik naggataamillu taasisitsinermi Ruth Heilmann Simon Olsenimit taanikinneruvoq taamaalillunilu Simon Olsen siulittaasunngortinneqarpoq.
