Siumukkormiut aasaanerani sorsuuttut
- Inatsisartuniit sulinngiffeqarnera tassunga unitsissanerlugu isumaliutigaara. Piffissami kingullermi pisut akuersaarsinnaanngisakka naammagilerpakka. Suleqataaniartut suleqataassapput. Suleqataanianngitsut piissapput!, Vittus Qujaukitsoq Facebookimi quppernermini ilaatigut taama allappoq.
Tamatumunnga tunuliaqutaasoq tassaavoq, Per Berthelsen Inatsisartunut maajimi qinersisoqarmat toqqaannartumik qinigaannginnera, Siumumili sinniisussat pingajuattut inissisimanermigut Inatsisartunut iserluni. Vittus Qujaukitsoq aningaasaqarnermut nunami namminermilu pissutsinut naalakkersuisunngormat, ileqqut malillugit Inatsisartunit sulinngiffeqalermat tamanna pivoq.
Vittus Qujaukitsorlu Inatsisartunut uteqqinnissani maanna eqqarsaatersuutigaa, parteeqatini Per Berthelsen anisinniarlugu.
Tamatumunnga tunuliaqutaasoq Per Berthelsenip Sermitsiaq.AG-mi oqaaseqaatigisimasaani nassaassaavoq. Tassamini Aningaasaarnermut naalakkersuisoqarfiup pisortaata Jan H. Lynge-Pedersenip Aningaasaqarnermut aamma Nunami namminermi pissutsinut naalakkersuisoqarfimmit tunuarnera 'tupaallaatigalugu' nikallornartutullu oqaaseqarfigaa.
Per Berthelsen aningaasaqarnermut akisussaasuugallarami Jan H. Lyngemik atorfinitsitseqataavoq, taannalu, Naalakkersuisut siuliisa nalaanni, Palle Christiansenip Maliina Abelsenillu ataanni sulivoq iluarisimaarneqarlunilu.
Vittus Qujaukitsulli ukiuni arlalinni naalakkersuisoqarfimmi pisortaasimasoq peersippaa, tamannalu Nunatta karsianut taamatumullu akileraartartunut akisuvoq, soraarsitaaneranummi atatillugu ajunngitsorsiassat 2 millioner koruuninik aningaasartaqarput.
Per Berthelsen maanna aasaanerani sulinngiffeqartoq, Facebookimi ippassaq unnukkut ima allappoq:
- Isumaqarpunga assut mamaatsoornarlunilu narrujuumminartoq anisinneqarnissannik eqqarsaatit facebook aqqutigalugu tusassallugit. Maannali feeriarpunga unalu pillugu isummersoqqinniarnanga. feeriarluarisi aasarsiorluarisilu, politikeri Siumumeersoq allappoq.
