Siumoortumik nalunaarsuiffinnik immersuiffissanngorpoq
Isertitanut imaluunniit ilanngaatissanut tunngasut ukioq kingullermut imaluunniit ukiup matuma ingerlaneranut sanilliullugit annertuumik allannguuteqarsimappata, pingaaruteqarpoq siumoortumik nalunaarsuiffimmik immersuinissat.
Assersuutigalugu pigisamik aalaakkaasumik pisisimagaanni tunisaqarsimagaanniluunniit, imaluunniit assigisaannik allannguuteqartoqarsimappat, tamakku tamarmik 2010-mi qanoq annertutigisumik akileraarnissamut sunniuteqartitsissapput.
2010-mut siumoortumik nalunaarsuiffimmik tigusaqaraanni, paasissutissat naqeriikkat eqqortuuneri eqqumaffigineqassapput. Taakkununnga allannguutissaqaraanni ilassutissaqaraanniluunniit, qinnuigineqarput paasissutissat nunap immikkoortuani akileraaruseriffinnut piaartumik nassiuteqqullugit.
Akileraarutissat sinnerinut akiligassanikkusunngikkaanni pingaaruteqarpoq siumoortumik nalunaarsuinermi paasissutissanik eqqortunik nalunaaruteqarnissaq, Akileraartarnermut Aqutsisoqarfik erseqqissaavoq.
