Siulivut saviminermik ujaasillutik Nunatsinnut anngussimasorineqarput

Savimineq ullorissap anaanit pisoq pissarsiariniarlugu, naggueqatigiit inuit Alaskamiit nunatta kitaanut ingerlaarsimanissaat itsarsarsiuunit ilimagineqarpoq.

Canadamioq itsarnisarsiooq Roberth McGhee, Naggueqatigiit inuit issittup nunataata kangisinnerusortaanut nuussimanerannik paasisanik nutaanik saqqummiussivoq, Canadami nutaarsiassaqartitsivik Nunatsiaq News taamatut nalunaaruteqarpoq.

Savimineq ullorissap anaanit pisoq, ukiut 10.000-it matuma siornatigut Innaanganermut Savissiviup kitaanut nakkarpoq.

Taamanikkut inuit Innaangarngup eqqaani najuaqartut inuiaapput assigiinngitsunit aallaaveqartut, itsarnisarsiuunit tuninik taaguuteqartinneqartut.

Savimineq taamanikkut saviliarineqartarpoq aamma unaamik tuukkartalimmik sananermi atorneqartarluni.

Innaanganerup eqqaani savimineqarnera naggueqatigiinni inunni tusaamaneqalerpoq, tamatuma kinguneraa naggueqatigiit inuit amerlasoorsuullutik Alaskamit kangimut ingerlaarnerannik.

Alaskamit Kalaallit Nunaannut 4.000 kilometerinik isorartussuseqarpoq.

Naggueqatigiit inuit ukiut qulikkaat arlaqartut ingerlaarsimanissaat itsarnisarsiuunit siornatigut eqqoriarneqarpoq.

Naggueqatigiit inuit taamak sivisutigisumik kangimut ingerlaarsimanissaat itsarnisarsiuumit Robert McGhee-mit ilimagineqanngilaq, taannami isumaqarpoq, naggueqatigiit inuit siunniussaminnik aalajangersimalluinnarnerat aallaavigalugu ukiut ikittuinnaat atorlugit Alaskamit Kalaallit Nunaannut ingerlaarsimassasut.