Siulittaasoqarfimmi avissaartuunneq

Taama isornartorsiuisoqarnera Siulittaasoqarfimmi, nalinginnaasumik partiilersorfiuneq ajortumi, avissaartuutsitsilerpoq.

- Allaanngilaq pasiumasatsinik apereqqusaanngitsugut. Taamatut misigisimavugut. Allaanngilaq isertuunniarneqartoq, ataatsimiinnerup sivitsorneqarsinnaaneranut suna tunngaviusoq. Josef Motzfeldtip ippassaq akineratigut misigisimanarput, naalakkersuisunik illersuisoq, Siumup gruppiani siulittaasoq, Malik Berthelsen, oqarpoq.

Taama isornartorsiuineq Siulittaasoqarfimmi avissaartuutsitsilerpoq.

Siulittaasup tullia siulleq Per Berthelsen:

- Isumaqataanngilanga, nipangiussinissamik piumasaqaataasoq pallittaalisatut atorneqassappat. Taamaalillunilu qulaaniit aqutsinerujussuaq avammut malugitinnaveersaarlugu.

Uanga tamanna peqataaffigiumanngilara. Pineqartut tassaapput Inatsisartunut ilaasortat. Uagut siulittaasoqarfittut ilaasortavut pitsaanerpaamik sullittussaavagut, Per Berthelsen oqarpoq. Aamma oqarpoq, taamatut oqalunnini nammineq Siumumut ilaasortaanerminik pissuteqartoq.

Apeqqutaatinngilluinnarpara, kikkut taamatut apeqquteqarnersut, Per Berthelsen oqarpoq.

Kisianni Inatsisartut siulittaasuata, Josef Motzfeldtip, Siulittaasoqarfik partiit aallavigalugit sulinnginnerarpaa:

- Siulittaasoqarfik Nunap qullersaatut oqaatigisariaqarpoq, Siulittaasoqarfimmilu malittarisassavut malissinnaanngikkutsigit, allat malittarisassanik malinneqqullugit oqalussinnaangilagut, Josef Motzfeldt oqarpoq. Aamma oqarpoq, ippassaq ataatsimiinnermi aqutsisutut erseqqinnerusumik nassuiaasinnaasimanani, siulittaasoqarfimmi isumaqatigiittoqarsimatinnagu.

- Ataatsimiinnermi ataasiakkaarluta aqutsisuusarpugut. Taamaammat Siulittaasoqarfimmik uparuaanerit inimi ataatsimiittarfimmi oqaluuserineqarsinnaanngillat. Siulittaasoqarfik uparuarneqassappat, Siulittaasoqarfik ataatsimoorluni isummertariaqarpoq, uparuaat qanoq isummerfigissanerlugu, Siulittasoqarfimmilu taamaattut sammisarpagut.

Tassalu ukiakkut ataatsimiinnerup sivitsorneqarsinnaaneranut tunngavilersuutaasoq suli atuuppoq.

- Inatsisiliornermi ataatsimiititaliani sulinerit naalakkersuisullu ingerlaqatiginiarnerat ajornartorsiuteqarsinnaammat, kinguaattoornermik kinguneqartumik, Inatsisartuni ilaasortat Siulittaasoqarfimmiit maannangaaq kalerrinnissaat pisariaqartissimavarput, imaassinnaasoq ukiakkut ataatsimiinneq, novembarip aqqarnani naasussaagaluaq, sivitsorneqartoq.

Demokraatit Siulittaasoqarfimmi ilaasortaatitaat, Justus Hansen, KNR-imut oqarpoq, ataatsimiinnerup sivitsorneqarsinnaaneranik siulittaasup nassuiaanera naammagisimaarlugu.

- Siulittaasoqarfimmi siulittaasorput tamakkiisumik tapersersorpara. Ataatsimiittarfimmi aalajangiinera eqqortuusoq isumaqarpunga. Aamma isumaqarpunga, ataatsimiinnerup sivitsorneqarnissaanut suna peqqutaanersoq eqqortumik kingusinnerusukkut nassuiarumaaraa, Justus Hansen oqarpoq.