Siulittaasoq tunuaqquaat

KANUKOKA-p siulittaasuata sullissinera naammaginagu kommunit arfinillit piumasaqarput, immikkut ittumik ataatsimeersuartoqassasoq, tamannalu KANUKOKA-mit akuerineqarpoq.

Narsap borgmesteria Kiista P Isaksen, siulittaasumik naammaginninnginnini ima tunngavilersorpaa:

- KANUKOKA-p malittarisassaani allaqqasoqarpoq; Peqatigiiffiup siunertaraa kommunit ataatsimoorlutik naliginnaasumillu soqutigisai isumagissallugit, aammalu kommunit akunnermini suleqatigiinnerat siuarsassallugu, kommunillu ingerlatsineranni ikiuutissalluni. Ullumilu pisariaqartinneqarpoq, suliassanik kivitsisinnaasumik siulittaasoqaqqilernissaq. Assersuutigalugu borgmesterit kommunaldirektørillu kingullermik Bruxelles-mi københavnimilu ataatsimiimmata, maqaasisimaqaarput, siulittaasutta kommunit kattunnissaanut apeqqutinut pingaarutilerujussuarnut peqataannginera. Pingaartumik borgmesterit 14-it atsioqatigiissutigisaanut kattussuutsitsinissamik kinguartitseqqusinerannut.

Narsami borgmesteri Kiista P Isaksen taama oqarpoq.

KANUKOKA-p siulittaasua Lars Kars Jensen kommuninit uparuartuutigineqartunut ilisarsinnginnerarpoq. Ataatsimeersuarnissamilu siulittaasuuginnarnissaminik sulissuteqassamaarnerarpoq.

KANUKOKA-mi siulersuisut siunnersuutigaat, KANUKOKA-p maajip 22-ani 23-anilu ataatsimiinnissaani immikkut ittumik ataatsimiittoqassasoq.