Siulersuisut Kielsen Naalakkersuisunut aqutsiinnassanersoq suli isummerfiginngikkaat
Siulersuisuunngortulli maannamut suli aalajanginngillat. Taakkua partiimi siulittaasuujunnaartoq Naalakkersuisunulli siulittaasuusoq Kim Kielsen ataatsimeeqatigeqqaarumavaat.
Siumup siulersuisuuneri:
- Siulittaasoq: Erik Jensen.
- Siulittaasup tullia: Vivian Motzfeldt.
- Aaqqisuussaanermut siulittaasup tullia: Inga Dora G. Markussen.
- Sakio Fleischer, Avannaata Kommunia.
- Per-Ole Frederiksen, Kommune Qeqertalik.
- Judithe Larsen, Qeqqata Kommunia.
- Peter Davidsen, Kommuneqarfik Sermersooq.
- Josef Petersen, Kommune Kujalleq.
- Aki-Matilda Høegh-Dam.
- Mala Høy Kuko.
- Bernhard Olsen.
- Inuk Kielsen Fleischer.
- Inissaq ataaseq, Siumup inuusuttaasa toqqassavaat.
Qaquguli ataatsimeeqatigissanerlugu ataasinngornerup ullaatungaani suli nalugaat, ullulli ingerlanerani ulluliinissartik ilimagigitsik siulersuisuunernut ilaasortanngortoq, Aki-Matilda Høegh-Dam, KNR-imut paasissutissiivoq.
Tassalu Siumut Naalakkersuisunut siulittaasuunngitsumik maanna siulittaasoqalerpoq.
Siulersuisuuninngortut apeqqummik maanna akiniagassaqartut, siulittasunngortup siulittaasuujunnaartullu isumaqatigiissutigaat.
Periarfissat pingasut
Siullertut, Kim Kielsenip Erik Jensen Naalakkersuisunut siulittaasunngortissinnaavaa, taamaattoqassappalli Inatsisartunut ilaasortat amerlanerussutillit tamanna akuereqqaartariaqarpaat.
Aappaattut, Kielsen Inatsisartunut 2022-imi qinersinissap tungaanut Naalakkersuisuni siulittaasuusinnaavoq.
Imaluunniit kingullertut qinersinissamik suaaruteqarsinnaalluni.
AAMMA ATUARUK Erik Jensen Siumumi siulittaasunngortoq
Ilisimatusarfimmili inuiaqatigiilerinermut adjunktip, Rasmus Leander Nielsenip, Kim Kielsen partiimi siulittaasuunani Naalakkersuisunut siulittaasuuginnarnissaa ilimaginngilaa.
- Taamaassasoringilara. Partiimi kina siuttuunersoq taama nalorninartigissatillugu, partiip aqunnissaa ajornakusuussaaq, Rasmus Leander Nielsen oqarpoq.