Inatsimmik allannguiniarneq: Siulersuisut ajunngitsorsiassaqalersinneqassapput

Nunatta naatsorsueqqissaartarfiani siuliersuisuni ilaasortat atuuffiminni akissarsiaqartinneqaratik maannamut sulipput. 

Naatsorsueqqissaartarfimmi siulersuisuni ilaasortaanissap soqutiginarsarneqarnissaa qulakkeerniarlugu Naalakkersuisut inatsit allanngortinniarpaat.

Siulersuisut suliat angisuut naammassisartussaagamikkit ajunngitsorsiaqartinneqalissapput.

Tamannalu Naatsorsueqqissaartarfimmi siulersuisuni siulittaasup nuannaarutigaa:

- Siulersuisuni ilaasortat ajunngitsorsiassanik neqeroorfigineqartalerniarnerat naapertuuppoq, siulittaasoq Vøgg Løwe Nielsen oqarpoq.

Naalakkersuisullu taamaaliornermikkut siulersuisut sulingaatsiartarnerat akilerpaat.

Siulersuisunimi suligaanni suliffiup avataani sivisuumik sulisoqartartoq, siulittaasoq oqaluttuarpoq:

- Piffissaq qanoq sivisutigisoq atorlugu sulisarnersut oqaatigiuminaappoq, kisianni uanga siulersuisuni sapaatip akunnerata ingerlanerani ulloq ataaseq ullut marlulluunniit sulisarpunga, Naatsorsueqqissaartarfimmi siulersuisuni siulittaasoq, Vøgg Løwe Nielsen, oqarpoq.

Siulersuisuni ilaasortat pisortat suliffiutaanni atorfillit ajunngitsorsiaqartinneqartassanngitsut, Naalakkersuisut siusinnerusukkut siunnersuutigigaluarpaat.

Tamannali maanna allanngortinneqalerpoq, tassalu siulersuisuni ilaasortat, pisortat suliffiutaanni sulisuugaluarunilluunnit, ajunngitsorsiassaqalersinneqarnissaannik siunnersuut Inatsisartuni ullumi saqqummiunneqaassaaq.

Siunnersuut akuerineqarpat Naatsorsueqqissaartarfiup siulersuisuini ilaasortat ukiumut amerlanerpaanik 35.000 koruuninik ajunngitsorsiassaqalissapput.

Siulersuisuni siulittaasoq amerlanerpaanik 90.000 koruuninik ukiumut ajunngitsorsiassaqalissaaq.

Inatsit allanngorpat, taanna januaarip aallaqqaataani 2018-imi atuutilersinneqassaaq.