Siulersuisunut ilaasortaaffimminit tunuarpoq

Narsami Kuannersuarni uranitalinnik aatsitassarsiornissami suliniummi akerleriissutaaqisumi suliffeqarfimmi Greenland Minerals and Energy Ltd-imi, taassumalu nunatsinni suliffeqarfiutaanni, siulersuisut avissaartuupput.

Aatsitassanut pisortaqarfimmi pisortaasimasoq, Hans Kristian Schønwandt, ikinnerussuteqarluni piginneqataasoq, Westrip - Tuluit Nunaanni aatsitassarsiornermut suliffeqarfik - sinnerlugu siulersuisuni ilaasortaasoq, ingerlaannaq atuutilersumik siulersuisuni ilaasortaaffimminit tunuarpoq.

Hans Kristians Schønwandt Sermitsiamut oqarpoq, suliffeqarfinni marluusuni siulersuisuniinnermini Kuannersuarni suliniut pillugu paasissutissanik pingaarluinnartunik pissarsisinnaasarsimanani, siulersuisunilu ilaasortatut akisussaaffeqarnini tunngavigalugu allatut iliornissaminik periarfissaqarani, taamaallaalli tunuarnissaq periarfissaralugu.