Siuarsaasut nersornaaserpaat

Juullilernerani pisartut ilagaat sinerissami inuit maligassiuilluartut sulilluarsimasullu nersornaaserneqartarnerat. Nunatsinni aningaasaateqarfiit juullilernerani nersornaatinik tunniussisartut ilagaat, Augo Lyngemut eqqaaniutitut aningaasaateqarfik.
Allattoq Apollo Jeremiassen
decembarip 21-at 2011 07:03

Folketingemi ilaasortat nunatsinneersut siullersaat Augo Lynge atsiullugu Aningaasaateqarfik taanna pilersinneqarpoq. Nersornaaserneqartartut tassaallutik, aalisarnermik piniarnermik savaateqarnermillu inuuussutissarsiutinik malunnatilimmik suliniuteqartut.  

Inuit sisamat nersornaaserneqartussatut toqqarneqarput, taakkualu allagartamik  4.000 koruuninik aningaasartalimmik tunineqassapput. Nersornaaserneqartut tassaapput:

Aage Hammeken, Illoqqortoormiut
Niels Peter Christensen, Innaarsuit
Jerimias Skade, Ukkusissat
Morten Rafaelsen, Qasigiannguit.

Taaneqartut  najugaqarfigisaminni ullumi nersornaaserneqassapput, taakkua kommunalbestyrelsemi ilaasortanit aamma nunaqarfimmi aqutsisunit tunniunneqassallutik.

Nersornaaserneqartut tamarmik nunaqarfimmi illoqarfimmilu aalisartut piniartut savaatillillu peqatigiiffiannit Augo Lyngemut eqqaaniutitut aningaasaateqarfimmut  nersornaaserneqartussatut innersuussutigineqarput. Aningaasaateqarfimmi Augo Lyngemut eqqaaniutitut aningaasaateqarfimmi siulersuisut tassaapput: Aalisarnermut Piniarnermullu Naalakkersuisoq Ane Hansen, KNAPK-p siulittaasua Leif Fontaine aamma KNAPK-mi siulersuisuni ilaaasortaq Isak Vahl.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq