Nunatta eqqartuussisuuneqarfia Sisorarfiit soraarsitsinermi 358.000 koruuninik taarsiinikinnerussasut
Sisorarfiit, majuartaammik ingerlatsiviup Knud Chemnitzillu eqqartuussissuserisui marlunngormat Nunatta Eqqartuussisuuneqarfianiipput. Eqqartuussisuuneqarfiup Knud Chemnitzip filmiliortunut sioorasaarerpaluttumik sakkortuuliorsimanera pissutigalugu suliffimmiit anisitaanera pissusissamisoortuunersoq aalajangiiffigineqartussaalluni.
Nunatsinni Eqqartuussiviit eqqartuussivimmi suliaq suliarereersimagaluarpaa, eqqartuussisullu Knud Chemnitzimut pissusissamisuunngitsumik suliffimmiit anisitaanera pillugu 600.124 koruuninik taarsiisoqarnissaa aalajangerpaat. Sisorarfiit suliaq Nunatta Eqqartuussisuuneqarfianut suliassanngorteqqippaat, suliamilu pinngitsuutinneqannginnissaminnik piumasaqaateqarlutik.
Nunatta Eqqartuussisuuneqarfiata nunatsinni eqqartuussiviit suliffimmiit anisitsinerup naapertuutinnginneranik isumaqarlutik aalajangiinerat isumaqatigigaluarlugu, aalajangiinerat allanngortippaa.
Nunattalu Eqqartuussisuuneqarfialu isumaqarpoq filmiliortunut pisup kingorna Knud Chemnitzip soraarsinneqarnissaa ajussanngikkaluartoq.
AAMMA ATUARUK Sisorarfinni sulisup soraarsitaaneranut suliaq eqqartuussivimmi suliareqqitassanngortinneqarpoq
Tamanna tunngavigalugu Sisorarfiit taarsiinissaannut akiliutigeqquneqartoq 242.000 koruuninut apparpaa. Tassa Nunatsinni Eqqartuussiviit aalajangigaannit 358.000 koruuninik ikinnerulersillugi. Eqqartuussissuserisut marluk suliamut tunngatillugu KNR-imut taama ilisimatitsipput.
Knud Chemnitzimut taarsiigassiarineqartoq annikinnerungaatsialeraluartoq, ilorrisimaaginnarpoq:
- Suli ajungaavunga. Nunatsinni eqqartuussiviit uannut taarsiisoqarnissaanik aalajangigaat pissannginnakkit soorunami uggornarpoq. Tamannali akuerisariaqarparput. Eqqartuussivimmimi suliami soraarsinneqarnera naapertuunnersoq pineqarpoq, Chemnitz KNR-imut oqarpoq.
Taanna pisut akornanni ingerlaqqippoq nutaamillu suliffittaarsimalluni, paasissutissiivoq.
Nunatsinni Eqqartuussiviit Sisorarfiit eqqartuussivimmi suliamut aningaasartuutit 45.000 koruuninik akiliisussanngortinneqarpoq. Illuatungeriit tamanna nunatta eqqartuussisuuneqarfianit qanoq aalajangiiffigineqarnissaa utaqqivaat.
Knud Chemnitz Sisorarfiinni soraarsitaaffimmini 1993-imit 2016-imut atorfeqarpoq.