Sisoraatinik oqilaniuttartut sungiusaasortaarput

Erik Amondsenimik ateqarpoq, 22-nillu ukioqarluni. Tassalu ukiualunni kalaallit ujamminik pissarsisiaqartarsimannginnerat sungiusaasunngorlaap allanngortinniartariaqassavaa. Taamaattumillu sisorartartartut kattuffianni sisoraatinik oqilaniunnermut ataatsimiititalimik naapitsinissani siullersaatillugu sulissutiginialersaarlugu.

Erik 22-nnarnik ukioqaraluarluni, maannamut misilittagaqarlualereersimavoq. Norgemi skigymnasiami sungiusaasutut ilinniarsimasuuvoq. Siornalu 2010-mi 23-t inorlugit ukiulinni Hinterzartenimiittumi Tysklandimi  peqataalluni. Aammalu pingasoriarluni Arctic Winter Gamesimi peqataasimavoq, tamatigullu peqataasarnermini ujamminik angerlaassisarsimalluni.

Erik Amondsen siornatigulli pikkorinnerni unammisartuuvoq, tassani piumasaqaataasarluni arpattartut anguniakkamik aalajangersimasumik siunnerfeqarnissaat.

- Erik Amondsenip sungiusaasutut takutereerpaa, inuusuttunik kajumissaarilluarneq, ujakkaarnermillu piumassuseqalersitsisarneq. Angutaavoq kattuffiup neriuuteqarfigilluagaa, Kalaallit Nunaanni sisorartartut kattuffiata avammut tusagassiutitigut nalunaarummini allappoq.

Eriup suliassaasa siullersarissavaa aappaagumut nunat issittut unammiuaarnerinut peqataanissamut piareersaaneq, nunali tamakkerlugulu sungiusaasuusup angusanik pitsaanerusunik ingerlaannaq takkussuuttoqalernissaa naatsorsuutiginngilaa.

- Aaqqissuussisoqaqqaartariaqarpoq, taamaasiortoqareerpat sulineq pimoorullugu ingerlanneqarsinnaassaaq. Eqqarsaatigaara videoliorniarlunga, nunatsinni ujakkaarnermik angusarissaarluartarsimasut apersorusullugit. Takorloorpara inuusuttunut takutikkusullugu unarsuaq tamakkerlugu taamatut angusaqarluartarsimanermut suut, qanorlu anguneqartarsimanersut, Erik Amondsen oqarpoq.

Erik Amondsen novembarip naanerani 23-nik ukioqalerluni inuuissiussaaq.