Sisoraaserlutik ooqattaasartartut kingulliit ilagaat
Tyskeq Arnd Peiffer nunarsuarmi pissartanngorpoq sisoraaserluni ooqattaasarnermi VM-qarnerani 10 kilometerimut unammisoqarmat.
Unamminermi peqataasut 125-iupput taakkunanilu Øystein Slettemark nunarput sinnerlugu unammisuni angusarissaarnersaavoq normu 102-nngorami. Inuusuttunnguaq Aqqarluartaa Olsen normu 113-nngorpoq kiisalu Kristian Kristoffersen nuakkami normu 120-nnguinnarluni.
- Napparsimasimanera suli timinniikkami, napparsimareerama sakkortuumik sungiusaqqinnikuunnginnama sukataarsinnaanera assut killeqarpoq, aamma malunnarpoq assut nukilaannerujussuusunga ullumi ilanniit, taama Kristian Kristoffersen oqaluttuarpoq.
Taamaattorli Aqqaluartaa Olsen misigisaminik pikkusuppoq.
- Assorsuaq pikkunarpoq unammersuarmi taama angitigisumik nunarput sinnerlugu peqataalluni. Unamminermi nuannisaqaanga assorsuarlu isiginnaartorpassuit nuannisartut nuannequtaallutik, taama Aqqaluartaa Olsen oqarpoq.
Øystein Slettemark angusarissaarnerusinnaasimagaluarpoq taamaattorli pallungalluni ataasiarluni uniorami nikorfallunilu pingasoriarluni uniorami kinguarsaatigalugit.