Sisoqqannissarsuarmut Sisimiormiut piareerput
Sisoraatinik oqilaniuttartut nunanit 16-ineersut - 80-it missaanniittut Nunatsinneersuullutik - timmisartorlutik umiarsuarlutilluunniit Sisimiunut ulluni makkunani tikerarput, sisoraatinik unamminerit nunarsuarmi sakkortunersaannut peqataajartorlutik.
Sisimiuni piumassutsiminnik ikiuuttussat 140-t missaanniittut ulapputtunnguupput. Aallarfissaq tikiffissarlu iluarsaanneqartussaavoq, erfalasulerfiit/aappalaartulerfiit nappaatiterneqassapput, aningaasaliisut aqqisa allagartarsui nivinngaassorneqassapput, unammeqataasussat, filmiliortussat tusagassiortullu tikerartut aaneqartarput inissaannukaassorneqarlutillu.
Sisoraatinik oqilaniuttartut najugaqarfissaat, Campen, maanna ikkussuunneqaleruttorpoq, nerisassat imeruersaatillu illoqarfimmiit unnuiffissamut kilometerit 33-t atorlugit ulluni tulliuttuni assartorneqassapput, qamuteralaat qimussillu atorlugit tamakku assartorneqassallutik.
Illerngit sisoqqaffiusussat sapaatip-akunnerata naanerani aperujussuarnerata kingorna maanna iluarsaanneqaleruttorput, silalu kissatsinnerummat - tassa ullukkut 30 missaanni isseriarluni maanna "qulit missaannaannik" issilermat, pissutsit ajunngilluinnartutut arpannissami aqutsisut nalilerpaat.
Sisimiuni sapaatip-akunnerata naanerani Arctic Circle Racertoqarnerani ullukkut tallimat qulillu akornanni, unnuakkullu 15-inik, issittarnissaa silamik ilimasaarummi ilimasaarutigineqarpoq, arfininngorpat immaqa nittaannissaa aamma ilimasaarutigineqarluni.
- Aningaasaliisorpassuit piumassutsiminnillu ikiortit pissutigalugit 16-inissaa ukioq-manna Arctic Circle Racertoqarnissaanut piareersimalluarluta oqarsinnaavugut, ACR-imi siulittaasoq, Jens Klaus Lennert, peqataasussat 141-t aallarnissaannut ullualunnguit sioqqullugit isumalluarpaseqaluni oqarpoq.